Bul jınaqtardy qurastyrý «Saryarqa kitaphanasy» redaksııalyq alqasy músheleriniń usynysymen jáne oblys basshylyǵynyń qoldaýymen tájirıbeli jýrnalıst Aman Janǵojınge tapsyrylǵan bolatyn. Uzaq jyl jergilikti «Ortalyq Qazaqstan» gazeti bas redaktorynyń birinshi orynbasary bolyp qyzmet etken qarymdy qalamger bul mindetti oıdaǵydaı atqaryp shyqty dep bek senimmen aıtýǵa bolady.
Birinshi kitap atynan kórinip turǵanyndaı, Qazaqstan Respýblıkasynyń Tuńǵysh Prezıdenti, Ult kóshbasshysy N.Á.Nazarbaevtyń eńbektegi jáne saıası qaıratkerlik qyzmeti bastalǵan qazynaly Qaraǵandy oblysymen baılanysyna arnalǵan. Jınaqta ardager jýrnalıster A.Saǵyndyqov, B.Bodaýbaev, A.Ahmetálimov, A.Starýhın, jazýshy Á.Ázıevterdiń sýrettemelerinde ótken ǵasyrdyń sonaý 60-jyldarynda jas metallýrg Nursultan Nazarbaevtyń alǵashqy eńbek qadamy qalaı bastalǵany baıandalady. Jýrnalısterdiń kelesi legi bolyp tabylatyn V.Jandaýletov, V.Ryjkov, A. Janǵojın bolashaq Elbasynyń Dneprodzerjınsk tehnıkalyq ýchılıshesinde oqyǵan jyldary minezi qalaı shynyqqanyn Ýkraınada birge oqyǵan serikteriniń atynan nanymdy baıandaıdy (bul avtorlar 2008 jyly Elbasy ómiriniń osy kezeńine arnalǵan «Ta zavodskaıa prohodnaıa...» degen jınaqty shyǵarýǵa qatysqan). Endi bir top tájirıbeli jýrnalıster M.Sembaev, A.Sáýlebekov, A.Nesipbaı, S.Seksenuly, E.Baltashuly, V.Mogılnıskıı, N.Ryjkova, E.Lahno, aqyn S.Bekseıit jáne t.b. ózderiniń ocherk-sýrettemelerinde Elbasynyń Qaraǵandy óńirimen tyǵyz baılanysyn túrli mysaldarmen asha túsken. Memleket basshysynyń Qaraǵandy oblysyna sapary, onyń ózi túlep ushqan Temirtaý qalasy men Qazaqstan Magnıtkasynyń torqaly toılarynan reportajdar men suhbattarǵa oryn berilgen. Sondaı-aq qatarlas qyzmet atqarǵan memlekettik qyzmetshiler S.Dosmaǵambetov, R.Omarbekova, N.Vahıtova men ot-jalyndy sehtarda qoıan-qoltyq eńbek etken Magnıtka metallýrgteri – Qazaqstannyń Eńbek Eri A.Júnisov, bilikti ınjenerler O.Soskoves, V.Nıkonov, Q.Omashev, T.Smaǵulovtyń estelikteri men esseleri oqyrmandy beı-jaı qaldyrmaıdy.
Jınaqta N.Nazarbaevtyń Qaraǵandy oblysynda qyzmet atqarǵan jyldary qazaq jáne orys tilderinde jazǵan keıbir tańdaýly maqalalary men «Stalnoı profıl Kazahstana» degen kitabynan úzindiler de keltirilgen.
Kitaptyń bolashaq urpaqty Elbasy ómiriniń mysalynda eńbeksúıgishtikke, patrıotızmge tárbıeleýde mańyzy zor ekeni belgili. Sol sebepti, kitapty qurastyrýda sarǵaıǵan gazetterdiń betterinen terip, ınternet jelisinen kóp izdenýge týra kelgen.
Elbasy týraly kitaptar az shyǵyp jatqan joq, biraq bul kitaptyń mańyzdylyǵy sol, bolashaq memleket basshysynyń eńbek joly qarapaıym gornovoıdan bastalyp, álemge áıgili saıasatker bolýy Saryarqa jerinde qalyptasqandyǵyn naqty dáleldermen asha túsý edi. Kitap sol maqsatyna jetken dep esepteımiz.
Ekinshi jınaq – «Saryarqa Táýelsizdik jyldary» – «Saryarka v gody Nezavısımostı» jergilikti jýrnalısterdiń Táýelsizdik jyldary Qaraǵandy oblysy eńbekshileriniń qol jetken jetistikteri, reformanyń alǵashqy jyldary kezdesken qıyndyqtardy qalaı eńsergendigi, Elbasy Nursultan Nazarbaevtyń «Qazaqstan-2030» jáne «Qazaqstan-2050 strategııalaryn qalaı júzege asyryp jatqandyǵy týraly jergilikti baspasóz betterinde jarııalanǵan materıaldardan iriktelgen. «Saryarqa kitaphanasy» negizinen Arqa óńiriniń aqyn-jazýshylarynyń shyǵarmalaryna arnalyp, árbir tulǵaǵa eki-úsh tom, nemese úsh-tórt aqynǵa bir tom arnalyp jatsa, munda oblysymyzdyń áleýmettik-ekonomıkalyq ómirin talmaı jarııalap júrgen jýrnalısterdiń eńbegi eskerýsiz qalmasyn degen maqsatpen tańdaýly shyǵarmalary bir tomǵa syıǵyzylǵan. Sonda joǵarydaǵy jınaqpen qosa eseptegende 60-tan astam gazet jáne radıo-televızııa jýrnalısteriniń shyǵarmalaryna oryn berilip, jınaqqa attary enip otyr. Demek, jýrnalıster sııaqty mádenı sala qyzmetkerleriniń úlken tobynyń esimderi eskerilip otyr.
Bir sózben aıtqanda, jınaqta berilgen kólem aıasynda qazynaly Qaraǵandy oblysynyń keshegisi men búgini jan-jaqty qamtylǵan deýge ábden bolady.
Qaırat ÁBILDA,
«Egemen Qazaqstan»
