Foto: Ashyq derekkóz
Vedomstvonyń málimetinshe, 2025 jyldyń qyrkúıeginde komıssıondyq dúken retinde jasyrynǵan iri lombardtar jelisi arqyly zańsyz mıkrokredıt berý shemasy áshkerelengen.
Zańsyz mıkronesıe berý shemasy anyqtaldy
Tergeý deregine sáıkes, «Aktıv Lombard» jelisiniń ıesi Sergeı Koınov jeke tulǵalarǵa komıssıondyq qyzmet kórsetkendeı etip, shyn máninde mıkronesıeler bergen. Qyzmettiń zańdy kórinýi úshin ol ózine tıesili «Aktıv Lombard» JShS-in, sondaı-aq senimdi tulǵalar atyna tirkelgen birneshe seriktes kompanııany paıdalanǵan. Atap aıtqanda:
- «One Billion Sales» JShS;
- «The Best Seller» JShS;
- «Shark in Sales» JShS.
Atalǵan uıymdar «Aktıv Market» biryńǵaı brendimen jumys istep, múlikti kepilge ala otyryp, shamadan tys joǵary paıyzben mıkronesıeler bergen. Komıssıondyq bólimsheler «Aktıv Lombard» fılıaldarymen bir ǵımaratta ornalasyp, klıentterge bir qyzmetkerler qyzmet kórsetken.
Aqtóbede zerger tutynýshylardyń buıymdaryn lombardqa ótkizip jibergen
Mıllıondaǵan kelisimshart jáne kiris
QMA málimetinshe, klıenttermen jasalǵan komıssııalyq sharttar jalǵan ári formaldy sıpatta bolǵan. Ortasha syıaqy mólsherlemesi táýligine 1,73-2,07% quraǵan, bul zańda belgilengen shekti mólsherden (0,3%) shamamen bes ese joǵary. Nátıjesinde 1,9 mıllıonnan astam kelisimshart jasalǵan jáne qylmystyq jolmen alynǵan tabys 19 mlrd teńgeden asqan.
Kiristerdi zańdastyrý tetigi áshkerelendi
Tergeý nusqasy boıynsha, Koınov tabystyń shyǵý kózin jasyrý úshin kópdeńgeıli zańdastyrý shemasyn qoldanǵan. Ol kompanııalarmen jalǵan kelisimsharttar jasap, qarajatty birneshe bank shoty arqyly aınaldyryp, keıin 5 mlrd teńgeden astam somany dıvıdend retinde shyǵarǵan.
Sonymen qatar Koınov «Zeus Co» JShS-in tirkep, baǵdarlamalyq qamtamasyz etý qyzmeti kórsetilgendeı etip, baǵasy qoldan ósirilgen kelisimder jasaǵan. Sonyń nátıjesinde kompanııa shotyna 2,5 mlrd teńge túsken, onyń 2,2 mlrd teńgesi Koınovqa dıvıdend retinde aýdarylǵan.
Sot sanksııasymen jalpy quny 8,9 mlrd teńgeni quraıtyn múlikke tyıym salyndy. Onyń ishinde:
- Astanadaǵy 4 páter men 2 turǵyn úı;
- BAÁ-degi 4 apartament;
- 6 qymbat avtokólik (Lexus LX 600, Rolls Royce Cullinan, Mercedes-Benz G63, Bentley Bentayga V8, Range Rover Sport);
- Banktik depozıtterdegi 2,7 mlrd teńge.
Sergeı Koınov qamaýǵa alyndy. Taǵy tórt adamǵa qatysty elden shyqpaý týraly qolhat túrindegi bultartpaý sharasy tańdalǵan.
Buǵan deıin agenttik «Aktıv Market» isi boıynsha jábirlenýshilerge paıyz tólemeýge bolatynyn, bul úshin QMA-ǵa júginý qajet ekenin habarlaǵan.
