Arab memleketteri, Eýropa jáne TMD elderine arnalǵan Úshinshi aımaqtyq forýmda jastar kóshbasshylyǵyn ilgeriletý arqyly yntymaqtastyqty keńeıtý múmkindikteri qarastyraldy. Alıhan Baımenov óz sózinde memlekettik qyzmetti damytý boıynsha maqsattarǵa jetýde jas kóshbasshylarǵa qajet faktorlardy kórsetti. «Birinshiden, bul - qundylyqtar. Adamnyń abyroıyn, árkimniń quqyǵy men múddesin, eńbegi men umtylysyn, sonymen birge ýaqytyn ózara qurmetteý men túsinistikpen qaraýǵa negizdelgen korporatıvti mádenıetten kez-kelgen júıe nemese uıym tek qana utady. Ekinshiden, bul – orta. Eger kóshbasshylar adam áleýetin barynsha damytýǵa jáne paıdalanýǵa jaǵdaı jasasa, uıymdar tıimdiligi arta túspek», - dedi Alıhan Baımenov.
Basqarýshy komıtet tóraǵasy, sondaı-aq, «Memlekettik qyzmet kórsetý salasyndaǵy ınnovasııany damytýǵa arnalǵan sıfrly ekojúıe» atty dóńgelek ústelge qatysty. Ol óz sózinde «Qazirgi ózara baılanysty ári ózgermeli álemde ınnovasııalardyń úkimet pen azamattar qarym-qatynasy sıpatyna áser etetin ár túrli jańa synaqtar, múmkindikter jáne dılemmalar týǵyzatynyn» atap ótti.
Eýrazııalyq aımaqtaǵy Ońtústik-Ońtústik yntymaqtastyǵynyń tabysty modelderin talqylaý boıynsha sessııada «áriptestik turaqty damý maqsattaryna jetýdegi elderdiń transformasııasy tabystylyǵynyń mańyzdy faktory» ekenin aıtty.
BUU Damý Baǵdarlamasy, Túrkitildes halyqtar yntymaqtastyǵy Keńesi, Sıngapýr jáne Bangladesh ókilderi sessııalar barysynda Astana habynyń memlekettik qyzmet salasyndaǵy tájirıbe jáne bilim almasýdyń tuǵyrnamasy retindegi halyqaralyq jáne aımaqaralyq yntymaqtastyqty damytýdaǵy rólin atap ótti.
Jıyndar barysynda Alıhan Baımenov BUU Bas hatshysynyń Ońtústik-Ońtústik yntymaqtastyǵy boıynsha Ýákili Horhe Chedıekpen, BUU Bas hatshysynyń gýmanıtarlyq máseleler boıynsha Ýákili Ahmed al-Meraıkhımen, BUU DB Eýropa jáne TMD elderi boıynsha Bıýrosynyń aımaqtyq dırektorynyń orynbasary Rastıslav Vrbenskımen, Túrkitildes elder yntymaqtastyǵy keńesi Bas hatshysy Ramıl Hasanovpen, Islam yntymaqtastyǵy uıymynyń zertteýler men oqytý ortalyǵynyń Bas dırektory Musa Kýlaklıkaııamen, Bangladesh, Marokko jáne Sıngapýr elderi ókilderimen kezdesti.

Taraptar Astana habymen yntymaqtastyqty keńeıtý jáne ári qaraı birlesken is-sharalar, onyń ishinde memlekettik basqarý boıynsha ǵylymı zertteýler jasaý, saraptamalyq materıaldyr jáne zertteýler nátıjelerimen almasý, oqytý baǵdarlamasyn daıarlaý boıynsha pikir almasty.
Hab jumysyna 38 memleket, onyń ishinde Amerıka, EO, TMD, Kavkaz jáne ASEAN elderi qatysady. 2014 jyly, Habqa Ońtústik-Ońtústik yntymaqtastyq boıynsha BUU Basqarmasynyń syılyǵy berildi. Ońtústik-Ońtústik yntymaqtastyǵy álemniń damýshy elderi arasyndaǵy ózara qarym-qatynas pen resýrstar, tehnologııalar jáne bilim almasýdy bildiredi.