Jıynǵa Bilim jáne ǵylym mınıstrliginiń mektepke deıingi jáne orta bilim berý departamentiniń ınklıýzıvti jáne arnaıy bilim berý bóliminiń basshysy Aıkerim Kúderınova, «Ashyq álem» Jastar eriktiler úıi» QQ dırektory Lıýdmıla Kaıgorodseva, Astana qalasy ákimdiginiń №2 psıhologııalyq-pedagogıkalyq túzetý kabınetiniń pedagog-defektolog, ádiskeri Sáýle Saǵymbaeva qatysty.
Kórý qabileti tómen balalarǵa arnalǵan arnaıy taktıldi kitaptar «Ashyq álem» Jastar eriktiler úıi» QQ men «Samruk-KazynaTrust» áleýmettik jobalardy damytý qorynyń birigip júzege asyryp jatqan «Erekshe balalarǵa arnalǵan erekshe kitaptar» jobasynyń aıasynda basyp shyǵarylǵan.
«Búgingi tańda Bilim jáne ǵylym mınıstrligi zaǵıp balalarǵa arnalǵan Braıl qaripimen terilgen oqýlyqtar jáne kórý qabileti tómen balalarǵa arnalǵan iri qaripti oqýlyqtar men OÁK qamtamasyz etý boıynsha belsendi jumys júrgizip jatyr. «Samruk-Kazyna Trust» qorymen birlese otyryp júzege asyrylyp jatqan «Erekshe balalarǵa arnalǵan erekshe kitaptar» jobasynyń aıasynda qazir kórý qabileti tómen jáne zaǵıp balalarǵa arnalǵan taktıldi oqýlyqtar daıyndaldy», dedi Bilim jáne ǵylym mınıstrliginiń ókili Aıgerim Kúderınova.
Onyń aıtýynsha, 2016-2019 jyldarǵa arnalǵan Qazaqstan Respýblıkasynda bilim jáne ǵylymdy damytýdyń memlekettik baǵdarlamasyna sáıkes, kórý qabileti tómen balalarǵa jáne aqyl-oıynda aýytqýshylyǵy bar balalarǵa arnalǵan oqýlyqtar ázirleý qarastyrylǵan.
«Osy jyly Qazaqstanda alǵash ret jańartylǵan baǵdarlamaǵa sáıkes Braıl júıesi boıynsha «Saýat ashý» jáne «Saýattylyqty damytý» 1-synyp oqýshylaryna arnalǵan oqýlyqtar men OÁK daıyndaldy. Joba aıasynda 250 taktıldi kitap daıyndaldy. Olar Qazaqstan boıynsha kózi nashar kóretin balalarǵa arnalǵan 29 mamandandyrylǵan mektepke deıingi mekemelerge jáne mektepterge taratylady. Bul kitaptardyń basty maqsaty – kózi nashar kóretin balalarǵa qorshaǵan ortany tanyp, bilýinde kómek kórsetý», dedi ol.
Raýan QAIDAR,
«Egemen Qazaqstan»
