Sýretti túsirgen Orynbaı BALMURAT, «Egemen Qazaqstan»
Kórmeniń maqsaty – astanany Almatydan Aqmolaǵa kóshirý tarıhy jáne jańa elordanyń salynýyn kórsetetin qujattarymen qalanyń turǵyndary men qonaqtaryn tanystyrý. Qazaqstannyń jańa astanasy statýsyn alýyna baılanysty damýdyń jańa kezeńderin beıneleıtin Astana qalasynyń Memlekettik muraǵatynyń qorlarynan, Ulttyq muraǵat pen Ortalyq Memlekettik muraǵattyń qorlarynan mańyzdy qujattar tuńǵysh ret halyq nazaryna usynyldy. Olardyń ishinde: elordany kóshirý týraly Qazaqstan Respýblıkasynyń Joǵarǵy Keńesiniń qaýlysy, Aqmola qalasyna kóshirýdiń saltanatty rásimin uıymdastyrý jáne ótkizý jónindegi respýblıkalyq uıymdastyrý komıteti otyrysynyń hattamasy, qalanyń salynýy týraly materıaldar, qalanyń pasporty, «Astana – jańa qala» arnaıy ekonomıkalyq aımaǵyn qurý týraly tarıhı qujattar bar.
Astana qalasynyń tuńǵysh ákimi Ádilbek Jaqsybekovtiń jeke qorynan alynǵan qujattar, nagradalar, Aqmola qalasyna joǵary jáne ortalyq organdardyń kóshirilýi boıynsha memlekettik komıssııanyń tóraǵasy F.Galımovtyń jeke qorynan alynǵan biregeı fotomaterıaldar – kórmeniń eń mándi buryshy boldy.
Muraǵattyq qujattarǵa qosymsha retinde Astana qalasynyń ákimdigine shetel delegasııalarynyń atynan ártúrli jyldary berilgen syılyqtar men kádesyılar da kórmeniń sánin kirgizdi. Kórmeniń ashylýyna ǵalymdar, tarıhshylar, depýtattar men muraǵatshylar, ǵylymı qyzmetkerler qatysty. Májilis depýtaty Baqytjan Ertaev: «Astanany kóshirý ońaı bolǵan joq. О́tken ǵasyrdyń sońynda qabyldanǵan tarıhı sheshimge biraz zııaly qaýym ókilderiniń narazy bolǵany da málim. Biraq Elbasynyń kóregen saıasaty, dana sózi astananyń kóshý mańyzdylyǵyna báriniń kózin jetkizdi. Búgin Astanamyz álemdegi mańyzdy saıası-ekonomıkalyq aımaqqa aınaldy. Bul jıyrma jylda ǵana jetken jetistik. Aldaǵy ýaqytta elordamyz budan da bıik tuǵyrǵa kóteriledi», dedi quttyqtaý sózinde.
Qazaqstannyń tarıhynda astanany Aqmolaǵa aýystyrý bizdiń memleketimizdiń damýynda erekshe oqıǵalardyń biri bolyp sanalady. Geografııalyq ornalasýy, ishki áleýeti, transporttyq-kommýnıkasııalyq júıesi de elimizge qolaıly bolatyn. Oǵan qosa, jaqyn jáne alys sheteldermen halyqaralyq yntymaqtastyqty keńeıtýmen baılanysty geosaıası máselelerdi sheshý jáne bolashaqta memleketimizdiń ekonomıkalyq turaqtylyǵyn qamtamasyz etetin megapolısterdiń biri bolyp qarastyrylady.
Aıta ketetin jaıt, kórme Astana qalasy Memlekettik muraǵatynyń kórme zalynda jeltoqsannyń aıaǵyna deıin jalǵasady.
Baǵashar TURSYNBAIULY,
«Egemen Qazaqstan»
