Kúdikti Kolesa.kz saıtyna avtokólik bólshekterin anaǵurlym tómen baǵamen satý týraly habarlandyrý berip, Qazaqstannyń toǵyz óńirinen, (Qostanaı, Qaraǵandy, Aqmola, Aqtóbe, Jambyl, Batys Qazaqstan, Mańǵystaý, Shyǵys Qazaqstan oblystary, Almaty qalasy) qanshama adamdardy aldap soqqan.
Qostanaılyq polıseıler kúdiktiniń jeke basyn anyqtaý úshin aıtarlyqtaı úlken jumys atqardy.
– Ústimizdegi jylǵy sáýir aıynda bizge Qostanaı oblysynda ınternet jelisindegi Kolesa.kz arqyly alaıaqtyq jasap júrgen top bar ekendigi týraly aqparat tústi. Alaıaqtyq syzbasyn jasaǵandar saıtqa kez kelgen sheteldik markaly avtokóliktiń bólshekterin satatyny týraly habarlandyrýlar ornalastyrady. Olar avtokóliktiń bólshekterin óte jaqsy bilgen, tájirıbesi bar, sondyqtan tutynýshylardy da sózine ılandyra bilipti. Olar satyp alýshylarǵa zattyń baǵasyn aldyn ala tolyq tóletip otyrǵan. Aqsha túsisimen habarlandyrý alynyp tastalady da, satyp alýshy olarmen baılanysqa shyǵa almaı qalady, – dedi Qostanaı oblysy IID KPB asa mańyzdy ister jónindegi aǵa jedel ýákili, polısııa podpolkovnıgi Janar Muǵalova.
Alaıaqtar «suranysty» ózderi turǵan Qostanaı oblysy turǵyndarynan almaýǵa tyrysqan, al bul qylmysty ashýdy, kúdiktilerdi anyqtaýdy kúrdelendire túsken. Olar esebine aqshany túrli bankter kartochkasymen alyp, ony Qostanaıda qolma-qol aqshaǵa aınaldyryp otyrǵan. Qostanaıdaǵy bankomattardan aqsha alǵanda erekshe saqtyqty da oılastyrǵan.
Polıseıler kúdiktilerdi izdestirý barysynda túrli sharalardy jan-jaqty qarastyrdy. Monıtorıngter ótkizgen, Kolesa.kz saıtynyń qyzmetkerlerimen tikeleı jumys istegen, osy saıtta alaıaqtar jarııalaǵan 100-den asa habarlandyrý shyqqany belgili bolǵan. Avtokólik bólshekterin satyp alý úshin adamdar Qazaqstannyń ár shalǵaıynan olardyń esebine túrli bankter arqyly 50 myńnan 250 myńǵa deıin aqsha aýdarǵan. Polıseılerdiń tııanaqty jumystarynyń arqasynda kúdiktiniń Qostanaı qalasynda turatyndyǵy anyqtaldy, oǵan tintý jasalǵanda bultartpaıtyn aıǵaqtar tabyldy.
Qostanaı oblysy Ishki ister departamenti Krımınaldyq polısııa basqarmasynyń bastyǵy, polısııa polkovnıgi Amangeldi Muhametqalıevtiń aıtýynsha, ǵalamtor alaıaǵyn ustaý, onyń tobyndaǵy adamdardy anyqtaý, qylmysyn moıyndatý ońaı bolmaǵan. Alaıaqtardan zardap shekkender sany tek 36 ǵana emes, odan da kóbeıýi yqtımal. Tergeý barysynda onymen birge alaıaqtyq jasaǵan taǵy bir adam anyqtaldy, ol ázirge kepilmen júr. Qazir kúdikti qamaýda otyr, sotqa deıingi tergeý amaldary júrip jatyr.
Názıra JÁRIMBET,
«Egemen Qazaqstan»
QOSTANAI
