HHIII qysqy Olımpııa oıyndaryna álemniń 80-nen astam elinen 5 myńdaı sportshy qatysady dep kútilip otyr. Onda 15 sport túrinen 102 medal jıyntyǵy sarapqa salynady. Al Qazaqstannan Olımpıadaǵa 9 sport túrinen 62 sportshy saıysqa túspek. Vıse-mınıstrdiń aıtýynsha, dál qazir otandyq qurama komandanyń qorjynynda 23 olımpııalyq lısenzııa bar. Onyń 10-y bıatlonnan, 10-y short-trekten, 3-eýi mánerlep syrǵanaýdan. Qalǵan qurama komandalar áli de jarystarǵa qatysyp, joldamalardy utyp alyp júrgenin eskersek, onyń sany ósýi múmkin. Sebebi, lısenzııalardy ıelený merzimi 2018 jylǵy 20 qańtarǵa deıin jalǵasady.
«Biz sportshylarymyzǵa úlken úmit artyp otyrmyz. Orta eseppen 50-ge jýyq olımpııalyq lısenzııaǵa qol jetkizemiz degen senimdemiz. Qazir ulttyq qurama komandanyń jarysqa yjdahatty daıyndalý kezeńin sapaly ótkizýdi uıymdastyrý, lısenzııalyq jarystarda tabysty óner kórsetýine jaǵdaı jasaý jáne Olımpıadaǵa kıetin sporttyq kıimderin ázirleý sekildi jumystar basty nazarǵa alynǵan. Osy oraıda sportshylarymyz týraly keńinen aqparat taratý úshin jýrnalısterge de jaǵdaı jasalyp otyrǵanyn aıtqym keledi. Rıodaǵy tájirıbedegideı Phenchhanda da arnaıy baspasóz ortalyǵyn ashamyz. Bul aqparat ókilderine Olımpıada ornynan jyldam habar taratýǵa múmkindik beredi», deıdi S.Musaıbekov.
Vıse-mınıstr, sondaı-aq sportshylarymyzdyń qysqy Olımpıadaǵa dopıngten ada, taza jolmen barýyna aıryqsha mán berilip otyrǵanyn jetkizdi. Onyń aıtýynsha, búginge deıin Qazaqstan sportshylary birneshe márte dopıng synamasyn tapsyryp, ol Germanııanyń Drezden qalasyndaǵy zerthanada tekserýden ótken. «Osy synamalardyń nátıjesi sportshylarymyzdyń dopıngten taza ekenin aıǵaqtaıdy. Olımpıadaǵa joldama alǵan sportshylarymyz jarystyń aldynda taǵy da dopıng synamalaryn tapsyratyn bolady. Jalpy, Qazaqstan – dopıngke qarsy memleket. Bizdiń basty maqsatymyz da – taza sport. Biz tek adal jolmen jeńiske jetýdi qalaımyz», dedi ol.
Qymbat TOQTAMURAT,
«Egemen Qazaqstan»
