Bul soǵystyń aıaqtalǵanyna da shırek ǵasyrdan artyq ýaqyt ótse de, ákelgen qaıǵysy jaýyngerlerdiń qanymen, analardyń kóz jasymen tarıh betterinde ózindik iz qaldyrdy. Ol saltanatty sharaǵa oblys kóleminde jınalǵan Aýǵan soǵysy ardagerleriniń, sol dalada máńgilik jastyǵyn qaldyrǵan bozdaqtardyń týǵan-týystarynyń janarlary osyny uqtyrdy.
Is-shara aýdandyq mádenıet úıi ónerpazdarynyń teatrlandyrylǵan kórinisinen bastaý aldy. Qyrshynynan qıylǵan jas ómir, nuralyq tórt bozdaq jaıly qoıylym men máńgilik jolǵa qarap balasyn tosqan ana kelbetin somdaǵan eskertkish jınalǵan qaýym janaryna jas uıalatty.
Kópshilik aldynda aýdan ákimi Nıqanbaı Omarhanov tarıh jylnamasynan óziniń qaraly, náýbet jyldarymen oryn alǵan zulmattyń biri – Aýǵan soǵysy ardagerlerine, búgingi kúnniń batyrlaryna qurmet kórsetip, izgi tilegin bildirdi. Eskertkishtiń avtory, músinshi Igor Bagramov.
Qaraǵandy qalasynyń Aýǵan soǵysy ardagerleri jáne múgedekter odaǵy qoǵamdyq birlestiginiń tóraǵasy Talǵat Bolatuly da Aýǵan soǵysy ardagerlerine kórsetilip jatqan qurmet úshin izgi iltıpatyn bildirdi.
Saltanatty sharaǵa Aýǵan soǵysy dalasynda erlikpen qaza tapqan Nıkolaı Pleshakovtyń anasy Lıýbov Trofımovna men Qadyrbaı Sembaevtyń qaryndasy Indıra Sembaeva arnaıy shaqyryldy.
Jınalǵan kópshilik eskertkishke taǵzym jasap, gúl shoqtaryn qoıdy. Aýdan ımamy Qumar Qonyskereı bozdaqtar rýhyna quran baǵyshtady.
Jalpy, Nura aýdany boıynsha 96 órimdeı jas bozdaq tabıǵaty da, tarıhy da ózgeshe Aýǵan soǵysynyń jan túrshigerlik qıyndyǵynyń kýágeri bolyp, oq pen ottyń astynda Otan aldyndaǵy boryshyn ótegen.
Mıras ASAN,
«Egemen Qazaqstan»
Qaraǵandy oblysy,
Nura aýdany
