Elimizde agrotýrızmdi damytýǵa kúsh salyp júrgen joba avtory bıyl «Asqabaq» merekesine eldi ekinshi ret jınap otyr. Jańa otbasylyq meıramǵa zııaly qaýym ókilderi, ósimdikterdi qorǵaý salasynyń mamandary men Qazaq ulttyq agrarlyq ýnıversıtetiniń stýdentteri ortaqtasty.
Kúz kelip, egin jınalyp, el damyl tapqanda ótkizýge bolatyn bul merekeniń maqsaty tek iship-jeý emes. Densaýlyqqa paıdaly tamaqtaný mádenıetin nasıhattaý. Al asqabaq – naǵyz qazaqtyń egetin daqyly. Kóp kútim talǵamaıdy. Uzaq saqtaýǵa bolady, deıdi aıdalaǵa aǵyp jatqan aryqtardy týǵan jeri Almaty oblysy, Kerbulaq aýdanynyń Basshı, Nurym, Araltóbe aýyldaryna buryp ákelip, talaı gektar jerdi baqqa aınaldyrǵan Gózel apamyz.
Aqıqatynda «Asqabaq» merekesiniń taǵylymdyq tustary kóp boldy. Jastar bir ǵana asqabaqtan san túrli, dámi til úıirer ári paıdaly as daıyndaýǵa bolatynyn kózderimen kórdi. Tárbıelik máni bar áńgimeler aıtyldy.
Mereke aıasynda shaǵyn kórme uıymdastyrylyp, «Jasyl beldeý» atty derekti fılm kórsetildi. Asqabaqtyń paıdasy, jylyjaı bıznesimen aınalysýdyń jaı-japsary jaıly kishigirim dáris ótkizildi. Dastarqanǵa qoıylǵan eshki sútinen jasalǵan azyq-túlikterdiń eresen paıdasy týraly áńgimeler de kókeıden shyqty.
Gózel Quljabaevanyń demeýshiligimen buǵan deıin de gúlstandyqtar Almaty oblysynda 2011 jyly 2 gektar jerge qaraǵaıly baq, 7 gektar jerge Kókterek baǵy, 2013 jyly Halyq ártisi Nurǵalı Núsipjanovtyń qurmetine 5 gektar alma baǵy, 2015 jyly 10 gektar aýmaqqa «Batyr analar» saıabaǵy, bıyl «Áýezov baǵy» boı kóterdi.
Endigi jerde Gózel Quljabaeva hanym Táýelsizdik merekesi kúnin aıryqsha atap ótýdiń úlgisin jasaýǵa qulshynyp otyr. Ol kisiniń oıynsha, egemendigimizdiń eń úlken meıramyn berekeli, mándi de sándi etip ótkizýdiń júz túrli joly bar.
Aınash ESALI,
«Egemen Qazaqstan»
ALMATY
