Biraq 20 jyl boıǵy aıryqsha dene eńbegi men erekshe ómir salty atalmysh ónerpazdardyń 40 jasqa kelgende óz mindetterin tıisti deńgeıde oryndaı almaýyn (ártúrli aýrýlar, jaraqattar, aǵzanyń tozýy jáne t.b.) jáne balet ártisteriniń kásibi zııandy mamandyqtardyń tizimine qosylǵanyn eskere otyryp, osy atalǵan óner ıelerin zeınetaqymen qamsyzdandyrý máselesi qaıta qaralyp, olardyń zeınetkerlik jasy tómendetilýi tıis dep esepteımiz. Osy máseleni aıtyp biz Premer-Mınıstr Baqytjan Saǵyntaevtyń atyna depýtattyq saýal joldadyq.
1991 jyldyń 17 maýsymynda qabyldanǵan «Qazaqstan Respýblıkasynda azamattardy zeınetaqymen qamsyzdandyrý týraly» Zańynda bul másele qarastyrylǵan edi. Atalmysh sanattaǵy qyzmetkerlerge ol Zańda jeńildikter berilgen. Alaıda bul norma 1997 jyly qabyldanǵan «Qazaqstan Respýblıkasynda zeınetaqymen qamsyzdandyrý týraly» Zańda alynyp tastaldy jáne búgingi qoldanystaǵy Zańǵa da engen joq. Parlament depýtattary osy máseleni palatalar otyrystarynda da, basqa alańdarda da birneshe ret kótergenin atap ótken jón. Memleket basshysy «Bolashaqqa baǵdar: rýhanı jańǵyrý» atty maqalasynda «álem bizdi qara altynmen nemese syrtqy saıasattaǵy iri bastamalarymyzben ǵana emes, mádenı jetistikterimizben de tanýy kerek» degen bolatyn. Demek, álemdik mańyzy bar mádenı is-sharalarǵa, túrli saıystar men konkýrstarǵa qatysyp, elimizdiń dańqyn shyǵaryp, halyqaralyq arenada Qazaqstandy dúnıe júzine tanytyp júrgen osyndaı ónerpazdarymyzǵa aýyr dene eńbeginiń júktemesinen densaýlyǵy erte syr beretindikten qoldaý kórsetip, olardyń zeınetkerlikke shyǵý jasyn tómendetýge bolady ǵoı. Sonda jas ata-analardyń bóbekterin erekshe ónerge erte bastan baýlýyn da yntalandyryp, olardyń sanyn arttyrǵan bolar edik. Jalpy, balet ónerindegi eńbek qalyptaǵy 18 jastan emes, áldeqaıda erte, 8-10 jastan bastalatynyn de eskerý kerek.
Narıman TО́REǴALIEV,
Senat depýtaty
