«Eki juldyz» saltanat saraıynda ótken shara qonaqtary Astana týraly foto kórmesin tamashalady. Sahna shymyldyǵy «Súgir» atyndaǵy qazaq ult aspaptar orkestriniń oryndaýyndaǵy B.Ryspanbetovtyń «Táýelsiz Qazaqstan» kúıimen túrildi.
Saltanatty sharada sóz alǵan oblys ákimi Janseıit Túımebaev jınalǵandardy merekemen quttyqtady.
«1997 jyly 10 jeltoqsan kúni Elbasymyz qazaq eliniń astanasyn Almatydan Aqmolaǵa kóshirý jónindegi tarıhı Jarlyqqa qol qoıdy. Bul kún – tek elorda turǵyndarynyń ǵana emes, búkil el halqynyń mereıli merekesi. Barshańyzdy osynaý merekemen shyn júrekten quttyqtaımyn! Kemeńger saıasatkerdiń osynaý kóregen sheshiminiń durys ekenin búginde ýaqyttyń ózi dáleldep berdi. Kóp uzamaı Astana elimizdiń ekonomıkalyq, saıası, mádenı ómiriniń qaınaǵan ortasyna aınaldy» - dedi Janseıit Qanseıituly.
Munan soń óńir basshysy elimizdiń damýy men ósip-órkendeýine eleýli úles qosqan 20 mesenatqa «Oblysqa sińirgen eńbegi úshin» medali men Alǵys hat tabystady. Mesenattar arasynda Shymkent qalasynda az qamtamasyz etilgen 6 otbasyǵa arnap úı salyp bergen Ǵanı Ahmetbaev, Arys qalasy Baıtoǵaı eldimekenindegi M.Mámetov jalpy orta mektebi janynan sport keshenin salyp bergen Hadısha Nurtaıqyzy syndy kásipkerler bar.
Aıta keteıik, búginde oblysymyzda «Týǵan jer» arnaıy jobasy boıynsha demeýshiler tarapynan jalpy 31 mlrd. 467 mln. teńgeni quraıtyn 577 óńirlik joba júzege asyrylýda.
Sonymen qatar, qoǵamdyq kelisimdi nyǵaıtý, gýmanısttik dáıekti qyzmet etý, qoǵamnyń rýhanı damýyna úles qosqan 11 azamatqa Elbasy N.Nazarbaevtyń alǵys haty, qurmet gramotasy jáne «Birlik» altyn medali tabystaldy.
Sondaı-aq, elimizde alǵash ret Qazaqstan Respýblıkasynda qaıyrymdylyq pen mesenattyq qyzmetti damytýǵa qosqan úlesi úshin Elbasynyń atynan Qazaqstan halqy Assambleıasynyń «Jomart jan» tósbelgisimen Latıpsha Asanov, Qazaqstan halqy Assambleıasynyń qoǵamdyq «Birlik» altyn medalimen Ábilqasym Dosbolov, Bekmat Turdyqulov, Pak Iýrıı, Lıdııa Mehlık, Hasan Hamedovter syndy azamattar marapattaldy.
Budan bólek, «Bolashaqqa baǵdar: rýhanı jańǵyrý» baǵdarlamalyq maqalasyn halyqqa nasıhattaý, túsindirý jumystarynda belsendilik tanytqan 4 azamat elenip, «Oblysqa sińirgen eńbegi úshin» medali jáne alǵys hatpen marapattaldy.
Sharada Astanada ótip jatqan túrli halyqaralyq is-sharalar jəne Halyqaralyq sporttyq oıyndar, «EKSPO-2017» kórmesiniń ótýi týraly beınerolıkter kórsetildi. Elimizge tanymal óńirimizdiń ónerpazdary B.Tileýhannyń «Jerim meniń», S. Bəıterekovtiń «Saryarqa» jəne ózge de avtorlardyń «Astana», «Sálem Astana», «Azııada alaýy-Astana», «EKSPO-2017» syndy birqatar ənderin oryndady. Shámshi Qaldaıaqovtyń «Otan» ənimen qorytyndylanǵan konserttik keshte «Qazyna», «Tumar», «Shamsınur» bı ujymdarymen qatar gımnastshylar da atsalysty.
