Bıyl jyl basynda elimizdiń eń tańdaýly 10 sýretshisi Almatyda ótken Ýnıversıada jarystaryn jarysa beınelep, ony ońtústik shahardyń shejiresine syıǵa tartty. Sol sýretshilerdiń arasynda pavlodarlyq О́serbaı Shoranov ta boldy jáne sporttyq doda aıasynda ótken baıqaýda «Stanokty kartına deńgeıinde aıaqtalǵan etıýd» atalymy boıynsha jeńimpaz atanǵany este. Onyń ústine sońǵy jyldary sýretshi elimizdiń onshaqty qalasyn asyqpaı aralap, kemeline kelgen shaqta kórikti mekenderimizdi maıly boıaýmen kenepke qaldyrdy.
Shoranovtyń sýretkerlik álemine saıahat jasaǵan adam aldymen onyń jumystarynan tarıhqa taǵzymdy, ata-babalar amanatyna adaldyqty, salt-dástúrge berilgen sálemdi, balalyq shaqqa shaqyrǵan saǵynyshty, aýyldyń ıisin, syldyrap aqqan ózenderdiń daýsyn jazbaı tanıdy. Osydan keıin bastapqy emosııa jaıyna qalyp, oryndalǵan jumystardyń taqyryptyq tutastyǵyn tánti ete bastamaq. Sýretshi tústerdiń úılesimin minsiz damyta otyryp, baıaý bir án salyp turǵandaı álemge bastaıdy. Bul sýretter bas-aıaǵy bar áńgime de sııaqty, ıakı bolmasa shabyttan týǵan mýzykalyq shyǵarma ispettes.
Mazmunǵa baı boıaýlar kerekýlik sýretshiniń buljymaıtyn baǵdarshamy. Kópti kórgen kósem, abyz sheshen áńgime bastaǵandaı áser «Temir jaýynger», «Kek», «Qahar», «Ana táńir», «Qoja Ahmet Iаsaýı kesenesi» syndy keskindemelerinen tanylady.
Al áıeldiń sulýlyǵy men meıirimin («Tań sulýy») moıyndamaǵan qylqalam sheberi tabylsa, ol da bir kem dúnıe bolary anyq. Balalyq shaqtyń túkpirinde oshaq basynda mazdaǵan armandar («Kóbik dámi») ulǵaıa kele búkil otandyq taqyryptarǵa («Ejelginiń izi») ulasady.
Boıaýlarǵa ámirin júrgize alatyn sýretshi óziniń sheberligin ulttyq qolónerdi áspetteýmen bekemdeı túsetinin moıyndaý lázim. Sonaý «Baıanaýyl ańyzdarynan» bastap, «Qalyńdyq jasaýy», «Kesh» sııaqty kartınalar sýretkerdiń ǵana emes, ulttyq beıneleý óneriniń ortaq baılyǵy emes pe?! Tekemet, quraq-kórpeler men basqurlar myń qubylǵan tústerden ǵana turmaıdy. Bul sýretterde ótken kúnniń belgileri, sımvolıkalyq nyshandar, petroglıfter sóıleıdi.
О́nertanýshylar Shoranovtyń ornamentaldyq jumystarynda tutastyq, boıaýlar minsizdigi men yrǵaq bar ekenine bir aýyzdan kelisedi.
Sonymen aldaǵy kúnderi sýretshiniń elordada «Uly Dala órnegi» atty eń úzdik jumystary qoıylatyn kórmesi bastalady. Bul kúnderi onyń eńbekteri Pavlodar kórkemsýret mýzeıinen, Qazaqstan Sýretshiler odaǵy dıreksııasynyń qorynan, Italııa, Fransııa, Iýgoslavııa, Germanııa, Reseı, Grýzııa, Qytaı, Ońtústik Koreıa jáne Bashqurtstan elderi jeke kolleksıonerleriniń jınaqtarynan tabylady.
Aınash ESALI,
«Egemen Qazaqstan»
ALMATY
