Máselen, keıbir sheneýnikter zertteý jáne tekserý jumystaryn atústi júrgizedi. Partııa men memlekettik mekemelerdiń keıbir ókilderi jáne olardyń jumysshylary qoǵamǵa paıdaly jumys istep júrgendeı kórinedi, alaıda olardyń áreketiniń ıgiligin halyq kórmeıdi. Memlekettik qyzmetkerlerdiń arasynda ekijúzdilerdiń bolýy da Qytaı tóraǵasyna unamaǵan kórinedi. Sondaı-aq Sı Szınpın partııa men memlekettik mekemelerdiń keıbir ókilderi bir-birine uqsas jıyndardy jıi ótkizip, onda shyǵarylǵan sheshimdi oryndaýǵa asyqpaǵanyn da synaǵan.
Sondaı-aq «Aspanasty eliniń» basshysy óńirlerdegi memlekettik qyzmetkerler men laýazymdy tulǵalardyń kemshiligine toqtalypty. Sı Szınpınniń aıtýynsha, óńirdegi memlekettik qyzmetkerler bir-biriniń qujattaryn aına-qatesiz kóshirip alady. Turǵyndardyń qajettiligin nazarǵa ilmeı, laýazymdy tulǵaǵa unaý maqsatynda jumys isteıtinder de tabylady. Keıbiri jarnamaǵa kóńil bólip, jumystyń tıimdiligin eskermeıtin kórinedi. Bilgenin joǵarydan jasyryp, jaǵdaı qıyndaǵansha qol qýsyryp otyratyn óńirlerdegi laýazymdy tulǵalar da Qytaı basshysynyń syn sadaǵyna ilingen. Budan bólek, Sı Szınpın óz qyzmetin durys atqarmaı, tapsyrylǵan mindetti qol astyndaǵylarǵa beretinder men joǵarynyń buıryǵyn kútip otyratyndarǵa shara qarastyrylatynyn jetkizgen.
The Guardian:
Izraıldiń áreketin qoldamaıdy
The Guardian gazeti Eýropa memleketteri B.Netanıahýdyń usynysyn qoldamaǵanyn habarlady. Basylymnyń sózine súıensek, odaqqa múshe elderdiń ókilderi bul qadam Taıaý Shyǵystaǵy jaǵdaıdy shıelenistirip, turaqsyzdyqqa ákelip soǵatynyn alǵa tartyp otyr. Sondaı-aq aǵylshyn gazeti AQSh prezıdenti Donald Tramptyń Ierýsalımdi Izraıldiń astanasy dep málimdeýi Palestına men Izraıl arasyndaǵy shıelenisti odan ári qıyndatyp jibergenin jazady.
Máselen, Izraıldiń eń jaqyn áriptesi sanalatyn Chehııa tarapy Eýropalyq odaq Keńesiniń otyrysynan keıin D.Tramptyń málimdemesi aımaqtaǵy beıbitshilik áreketterine keri áserin tıgizetinin jetkizgen. Fransııa syrtqy ister mınıstri Jan-Iv Le Drıan Qudys máselesi Palestına men Izraıl tarapynyń ortaq kelisimi nátıjesinde ǵana sheshiletinin aıtqan-dy. Keńes otyrysynan keıin B.Netanıahýmen kezdesken Fransııa prezıdenti Emmanýel Makron da Ierýsalımdi Izraıl astanasy dep taný beıbitshilikke nuqsan keltiretinin jáne óz eliniń oǵan qarsy ekenin sóz etti.
Eýropa odaǵynyń syrtqy saıasat jónindegi ókili Federıka Mogerını uıymnyń shahar jónindegi halyqaralyq konsensýsty qoldaıtynyn, palestınalyqtar men evreıler qala mártebesi jóninde ortaq kelisimge kelmeı, óz ustanymyn ózgertpeıtinin málimdegen.
Ierýsalımniń quqyqtyq mártebesi máselesine baılanysty taıaýda BUU Qaýipsizdik Keńesinde kezekten tys jınalys ótti. Otyrysqa Qazaqstan delegasııasy da qatysty. Kezdesý barysynda BUU Bas hatshysynyń Taıaý Shyǵystaǵy arnaıy ókili Nıkolaı Mladenov baıandama jasady.
Qazaqstannyń BUU-nyń janyndaǵy Turaqty ókili Qaırat Omarov elimizdiń Taıaý Shyǵys daǵdarysyna qatysty ustanymy anyq jáne ózgerissiz ekendigin jetkizdi. Q.Omarovtyń aıtýynsha, Qazaqstan taraptar arasyndaǵy kelissózderdiń ekijaqty pishimde alǵyshartsyz ótkizilýin qoldaıdy. Sondaı-aq Q.Omarov 1967 jylǵy kelisimge saı Palestına astanasy Shyǵys Ierýsalım ekenin jáne Palestına memleketin qurý quqyǵyn tolyqtaı qoldady.
BBC: Venesýeladaǵy jaǵdaı turaqsyz
BBC-diń málimetine súıensek, N.Madýro ótken jeksenbidegi aldyn ala daýys berýge qatysqan partııalar ǵana 2018 jylǵy saılaýǵa qatysýǵa quqyly ekenin sóz etken. Arnanyń habarlaýynsha, Justice First, Popular Will jáne Democratic Action partııasy saılaý júıesi ádiletsiz ekenin alǵa tartyp, jeksenbidegi daýys berýge boıkot jarııalaǵan eken. Alaıda N.Madýro bul pikirmen kelispeıtinin jetkizip, oppozısııalyq partııalar «saıası kartadan joǵalyp ketti» dep málimdegen.
Joǵaryda atalǵan partııalar aldyn ala daýys berýge boıkot jarııalaıtynyn qazan aıynda habarlaǵan. Olardyń pikirinshe, Venesýeladaǵy saılaý júıesi N.Madýrony qoldaýǵa ǵana arnalǵan. Jeksenbidegi daýys berýge elektorattyń 47 paıyzy qatysyp, sonyń kóp bóligi qazirgi prezıdentti jaqtap daýys berdi.
BBC-diń Latyn Amerıkasyndaǵy jýrnalısi Ketı Vatstyń pikirinshe, N.Madýronyń sózi arandatýshylyqpen teń. Tilshi eldegi ekonomıkalyq daǵdarystyń kesirinen prezıdent halyq aldyndaǵy abyroıynan aıyryla bastaǵanyn aıtady. Sondyqtan N.Madýro saıasat sahnasyndaǵy qarsylastarynyń kózin qurtýdy maqsat etip otyr. Nátıjesinde, birqatar oppozısııa ókilderin túrmege toǵytqan. K.Vats qazirgi tańda halyqtyń pikiri ekige jarylǵanyn aıtady. Biri – qazirgi prezıdent N.Madýrony qoldasa, kelesisi, onyń taqtan taıǵanyn qalaıdy. Jýrnalıstiń sózine súıensek, eldegi jaǵdaı áli de turaqsyz.
Sholýdy ázirlegen
Abaı ASANKELDIULY,
«Egemen Qazaqstan»
