Qus salyp, ań aýlaýǵa qyzyǵýshylyq tanytqandar Astana jáne Kókshetaý qalalarynan arnaıy avtobýstarmen Tekekól jaǵasyna jetkizilgen soń, saltanatty ashylý rásimi bolyp ótti. Oǵan kóppen birge Mońǵolııanyń Qazaqstandaǵy Tótenshe jáne ókiletti elshisi Lývsan Battýlga, Vengrııanyń Qazaqstandaǵy Tótenshe jáne ókiletti elshisiniń orynbasary Shando Dorogı, Aqmola oblysy ákiminiń orynbasary Aına Músirálimova jáne de Ulttyq sport túrleri boıynsha respýblıkalyq assosıasııasynyń ókilderi qatysty. Sondaı-aq aıtýly halyqaralyq týrınırge Qazaqstannyń ár óńiriniń, Reseı, Qytaı, Qyrǵyzstan, Mońǵolııa jáne Vengrııanyń 50-ge tarta qusbegileri kelipti.
Reti kelgende búrkitshi Másip Batyrhanuly týraly birer sóz aıta ketken oryndy shyǵar. Ekinshi dúnıejúzilik soǵysy jyldarynda barlyǵy da qan maıdanǵa jóneltilip, halyq ash-jalańash kúı keshkeni málim. Mine, osyndaı qıynshylyq zamanda aıtýly búrkitshi Zerendi aýdanynda qus pen ań aýlap, balalar men qarııalarǵa taratyp bergen kórinedi. О́zi de biraz jasqa kelgenine qaramastan, ańshylyqpen aınalysa júrip ań terisin Reseıge jóneltip, odan túsken qarjyǵa oq dári satyp alyp, maıdanǵa jóneltip otyrǵan. Sondyqtan da bir kezderi ózderin ashtyqtan qutqarǵan, aty ańyzǵa aınalǵan ańshyǵa arnap urpaqtary onyń qurmetine jyl saıyn osylaısha quspen ań aýlaý saıysyn ótkizip keledi.
Úsh kezeńnen turǵan týrnır barysynda búrkitshi men qustyń syrtqy kelbeti, olardyń kókte erkin qalyqtaýy jáne ań aýlaýy boıynsha baǵalandy. Qusbegilerdiń qustardy baptaýy men olardyń kókte erkin quıǵytýy, ań men qusqa quıyla kelip bas salýy este qalarlyqtaı áser etkeni kórinip turdy. Tabıǵat aıasynda ǵana bolatyn mundaı áserli kórinis kórermenderdiń kókeıinde uzaq saqtalary sózsiz. Osy turǵydan kelgende uıymdastyrýshylar kórermenderge úlken mereke syılady dep túıindeýge bolady. Onyń ústine atalǵan sharany barynsha tartymdy etý maqsatynda Aqmola oblysynyń ákimdigi «Qansonar-2017» halyqaralyq týrnıri jeńimpazyna jeńil avtokólik tikti. Budan basqa, Ulttyq sport túrleri boıynsha respýblıkalyq qaýymdastyq tarapynan 2 mıllıon teńge syıaqy taǵaıyndalǵandyǵyn aıta ketý kerek. Tartysty ótken týrnır barysynda Aqmola oblysy, Eńbekshilder aýdanynyń ókili Qanat Shúlenbaev jeńimpaz dep tanylyp, bas júlde avtokólikke ıe boldy. Bul oraıda qatysýshylar da, kórermender de «Qansonar» týrnıriniń elimizde ǵana emes, sonymen qatar shetelderde de jalǵasyn tabatynyna senim bildirdi.
Asqar TURAPBAIULY,
«Egemen Qazaqstan»
Aqmola oblysy
