2016 jyly áýejaıda 865 myńnan astam jolaýshyǵa qyzmet kórsetilgen. Al, bıyl 1 mln. jolaýshy saparǵa shyqqan. Munda alys jáne jaqyn shetelderge 24 baǵyt boıynsha ushýǵa múmkindik bar. Aqtaý áýejaıynan Máskeý, Stambýl, Baký qalalary arqyly álemniń kez-kelgen jerine saıahattaýǵa bolady. Bolashaqta Mılan, Amsterdam, London, Dýbaı, Gorgan, Týrkmenbashy, Samarkand baǵytyna reıster ashylmaq.
-Búgin kıeli túbekte 21 jyl buryn salynǵan shaǵyn áýejaı, qazir Eýrazııa kontınentindegi zamanaýı áýejaılarǵa saı keletin áýejaılardyń biri. 2009 jyly Aqtaý áýejaıy – «TMD elderi arasyndaǵy eń úzdik áýejaı» ataǵyn ıelense, 2010 jyly «TMD elderiniń áýejaılary arasyndaǵy eń qarqyndy damýshy áýejaı» atandy. Búginde osy áýejaıdan Elordamyzǵa óńirimizden 1 mıllıonynshy jolaýshysyn shyǵaryp salǵaly tur. Saparlaryńyzǵa sáttilik tileımin!, dedi sóz alǵan aımaq basshysy Eraly Toǵjanov.
Shara aıasynda jeńimpazdyń esimi lotoreıa júrgizý ádisimen kezdeısoq anyqtaldy. Aldyn-ala Elordaǵa attanǵaly turǵan barlyq jolaýshylarǵa tirkelý kezinde 2 dana ushaqqa otyrǵyzý talony berilgen. Osylaısha, talonnyń 1 danasyn uıymdastyrýshylar alyp, arnaıy jáshikke salǵan.
Jeńimpazdyń atyn áýejaıdaǵy eń kishkentaı jolaýshy men óńir basshysy Eraly Toǵjanov anyqtady. Onyń esimi - Sultangereı Tilegenov. Astana qalasyna ústel tenısinen jarysqa ketip bara jatqan ol qýanyshyn jasyra almady.
Jeńimpazǵa «Bek Air» áýe kompanııasynyń qoldaýymen Qazaqstannyń árbir qalasyna tegin sapar shegýge joldama men Aqtaý halyqaralyq áýejaıynda 1 jyl tegin CIP-zalynan tegin qyzmet kórsetý sertıfıkaty tabystaldy.
Sondaı-aq, mereke aıasynda áýejaıda aıanbaı eńbek etip júrgen mamandar oblys ákiminiń alǵys hatymen marapattaldy.
Jýyrda Aqtaý halyqaralyq áýejaıyna Senegal Prezıdenti Makı Sall bastaǵan delegasııa keldi. Negizgi baǵyttary – Japonııa. Qonaqtar qatarynda Senegal eliniń birinshi hanymy, Dakar qalasynyń meri men birqatar mınıstrler bar. Delegattardy oblys ákimi arnaıy qarsy alyp, ulttyq salt-dástúrge saı shapan kıgizdi. Olar qazaq eliniń qonaqjaılylyǵyna rıza bolyp, rızashylyqtaryn jetkizgen bolatyn.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
