Qytaıdaǵy qazaqtildi kıno ındýstrııanyń damýyna erekshe úles qosqan, qazaqtildi telearna qalyptastyrýǵa uzaq jyl jumys istegen, elimiz táýelsizdik alǵannan keıingi ýaqytta atamekenge oralyp, qazaq televızııasy men qazaq kınoónerine eren eńbek sińirgen talantty rejısser, aýdarmashy Ásemǵazy Qapanuly dúnıeden ótti.
Ásemǵazy Qapanuly 1968 jyly 15 tamyzda ómirge kelgen.
Ol elge kelgen soń «Habar», «Jetinshi arna», «Qazaqstan» ulttyq telearnalarynda dýblıaj bólimderinde ózindik qoltańbasyn qaldyryp qana qoımaı, «Kúltegin» syndy birneshe tarıhı-ekspedısııalyq fılmdermen qatar Tańjaryq aqynǵa, «Kók týydyń jelbiregeni» ániniń avtory Ermurat Zeıiphanǵa arnalǵan birneshe ómirderektik fılm túsirgen.
Onyń jýrnalıstik, jazýshylyq qyry óz aldyna ol óte talantty aýdarmashy edi. Lı Baı bastaǵan Qytaıdyń ejelgi dáýir óleńderin kóne jazý úlgisinen aýdaryp «Álem ádebıeti» jýrnalyna únemi jaryq kórip turdy.
Marqumnyń jany Jánnatta, topyraǵy torqa bolsyn! Otbasy, jaqyndaryna qaıǵyryp kóńil aıtamyz.
