Ár nysannyń ózindik mańyzy men ereksheligi bar. Degenmen, aýdan turǵyndary eki gektardan astam jerdi alyp jatqan Táýelsizdik saıabaǵy Sholaqqorǵannyń ajaryn asha túskenin aıtýda. Saıabaqta Táýelsizdikti aıshyqtaıtyn monýment pen 30 metrlik tuǵyrda kók baıraq ornatylǵan. Sondaı-aq, sý burqaqtar men jol aıryqtar salynǵan, otbasymen serýendep, demalýǵa jaǵdaı jasalǵan. Saıabaqtyń qurylys jumystaryn «Ammar Proekt» JShS-i júrgizipti. Demalys ornynyń ashylýyna qatysqan aýdan ákimi Salyhan Polatov barsha turǵyndardy Táýelsizdik merekesimen quttyqtap, aýdanǵa kórik beretin saıabaq sozaqtyqtar men qonaqtar úshin saıaly meken bolatynyn atap ótti.
Aıtýly merekege oraı ashylǵan eki birdeı balabaqsha memlekettik-jekemenshik áriptestik aıasynda el ıgiligine berildi. Aýdan ortalyǵyndaǵy jalpy alańy 254 sharshy metrdi quraıtyn «Asyl-Aı» bóbekjaı-balabaqshasy 75 balaǵa arnalǵan. Al, Sozaq aýyldyq okrýgindegi qos qabatty «Aıdyn» balabaqshasy 100 oryndyq. Balalar úshin barlyq jaǵdaı jasalǵan baqshada medısınalyq kabınet, tórt oıyn, tórt jatyn bólmesi men akt zaly bar. Balalar tamaqtanatyn ashana men sharýashylyq bólmesi jeke ornalasqan. Sondaı- aq, bul kúni, buqaralyq sportty damytý maqsatynda, ýran óndiretin «Inkaı» JShS-niń demeýshiligimen salynǵan, Sholaqqorǵan, Tasty, Qumkent aýyldarynda sport alańshalary el ıgiligine berildi.
Ǵalymjan ELShIBAI,
«Egemen Qazaqstan»
