Jıynǵa keńes músheleri, Májilis depýtattary, Mádenıet jáne sport mınıstrliginiń ókilderi men kásibı sarapshylar qatysty. Is-shara barysynda «Qasıetti Qazaqstan» ǵylymı-zertteý ortalyǵynyń dırektory Berik Ábdiǵalıuly qasıetti oryndar týraly baıandama jasady. Onyń aıtýynsha, Qazaqstannyń kıeli mekenderi erekshelikterine oraı bólingen. Máselen, tabıǵı turǵyda qalyptasqan qasıetti oryndar derbes qarastyrylǵan. Olardyń qatarynda Qońyr áýlıe úńgiri, Han Táńiri, Sharyn shatqaly sekildi mekender bar. Arheologııalyq eskertkishter men orta ǵasyrdaǵy shaharlar kelesi bólimge engen. Sondaı-aq B.Ábdiǵalıuly «Qazaqstannyń qasıetti jerleriniń jalpyulttyq jáne aımaqtyq tizimi» degen kitap jaryqqa shyǵatynyn málimdedi.
«Qazaqstannyń qasıetti jerlerin bekitkende olardyń mártebesin aıqyndaý arqyly eskertkishterdi qorǵaý jónindegi zańǵa ózgeris engizýdi kózdep otyrmyz. Mádenı eskertkishterdi qorǵaý týraly zańǵa «Qasıetti oryndar» degen tarmaqty qosý josparda bar. Osyndaı qadam arqyly ár mekenniń ǵylymı ári zańdy túrde anyqtamasy beriledi. Osylaısha, Qazaqstandaǵy qasıetti oryndardyń mártebesi zańdy túrde belgilenedi», dedi B.Ábdiǵalıuly.
Sonymen qatar is-sharada «Qazaqstannyń kıeli jerleriniń geografııasy» jobasynyń oryndalý barysy jóninde Mádenıet jáne sport mınıstrligi tarapynan atqarylyp jatqan jumystar baıandaldy. Otyrysqa qatysýshylar osy tóńirekte oı qozǵap, óz pikirlerimen bólisti.
Abaı ASANKELDIULY,
«Egemen Qazaqstan»
