Esti adam eski jyldy shyǵaryp salyp, jańa jyldy qarsy alyp turǵan sátinde, óz isine esep beredi. Eski jylǵa ókpem joq, shúkir, ózim úshin óte jemisti, qýanysh pen baqytqa toly jyl boldy. Qajyr-qaırattyń arqasynda 80-ge keldim, Elbasynyń qolynan «Altyn Juldyz» aldym. Jıyrmadan asa eldiń talantty ártisteriniń basyn qosyp, eń jaqsy spektaklderin kórý qurmetine bólegen Asanáli Áshimov atyndaǵy halyqaralyq teatr festıvali dúrkirep ótti. Quman, Merýert sııaqty taıanysh-tireýlerimmen birge Amerıkaǵa baryp, «Qyz Jibekti» kórsetip, jat eldiń jaqsy lebizin estip, kóńilimiz marqaıyp qaıttyq.
Bir adamnyń basynda osynsha qýanyshtyń bolýy baq emeı, baqyt emeı, nemene? Bul árıne, ónerimdi óristetip, baǵalaǵan teatrymnyń, qadirlegen qazaǵymnyń arqasy. Osy eldegi tynyshtyq pen beıbitshiliktiń arqasy. Jalǵyz meniń ǵana emes, shırek ǵasyrdan astam qyzmet istep kele jatqan ákemteatrym da arysy Anglııa men Japonııany, berisi, Tatarstan men qyrǵyz elin ónerimen tańyrqatyp, búgingi qazaq teatr óneriniń deńgeıi, qarymy men baǵyt-baǵdary eshbir elden artyq bolmasa, kem emes ekenin dáleldep qaıtty. Teatrdyń bul tynymsyz eńbegi men izdenisin Qazaqstan Úkimeti de laıyqty baǵalap, birneshe talantty jastarymyz joǵary marapat pen ataqqa ıe bolyp, ujym abyroıyn arttyra tústi. Osyndaı jaqsy isimiz ben jetistigimiz keler jyly da jalǵasyn tabady dep senemiz.
Ulttyq rýhymyzdy oıatatyn da, uıytatyn da rýhanı qazynamyz. Ásirese, óner. «Elý jylda – el jańa» dep jatady, qazir eldiń elý jylda emes, jıyrma jylda jańaratynyn kóz kórip otyr. Az ýaqyttyń ishinde egemen elimizdiń ekonomıkalyq ál-aýqaty, mádenı, rýhanı kelbeti buryn bolyp kórmegen bıik deńgeıge kóterildi. Búkil Qazaqstanymyz úshin qaıyrly, qutty jyldar bolyp keledi. Jyl jańa – meje jańa. Endeshe, esigin ashqan Jańa jyldan da kúter jaqsylyǵymyz kóp. Bastysy elimiz aman, jurtymyz tynysh bolsyn!
Asanáli Áshimov
Eńbek Eri,
KSRO halyq ártisi,
M.Áýezov atyndaǵy
Qazaq memlekettik akademııalyq drama teatrynyń kórkemdik jetekshisi
