Iýlııa, senen altyn kútemiz!

Ýaqyt júrdek. Anna Kor­ny­sheva eki jyldan keıin turmys quryp, Al­manııaǵa qonys aýdardy. Alǵashqy bapkeri Iýlııaǵa bar bil­genin jalyqpaı úıretti. Shy­damdylyq pen taktıkalyq sheberliktiń qyr-syryna qanyqqan daryndy qyzdy alǵashqy jat­tyq­tyrýshysy balalar men jas­ós­pirimder sport mektebiniń bapkeri Vıktor Pavlovıch Lemeshkoǵa tapsyryp ketti. Al Lemeshko frıs­taıldyń naǵyz tájirıbeli bapkeri bolatyn.

11 jasar talantty qyz 2003 jyly Reseıdiń Sankt-Peterbýrg qala­syndaǵy dú­birli jarysqa qatysyp, chem­pıondyq ataqqa ıe bolyp, kýbokty jeńip aldy. Arada úsh jyldan keıin jasóspirimder arasyndaǵy el birinshiliginde kúmis alqany ıelenip, sport she­beri atandy. Frıstaıldyń mogýl túrine ekiniń biri bara ber­­meıdi. Kedir-bu­dyrly taýdan tómen qa­raı zymyraǵan kezde bu­ry­lysta qate qımyl jasap qoısań, omaqasasyń. Árıne, talaı dúbirli jarys­tarda Iýlııa qatelikterge jol berip aldy. Biraq jasymady, qaıta ór­she­lenip, sheberligin shyńdaı tústi. 15-ke endi tolar kezde álem chempıona­tyna qaty­syp, alǵashqy ondyqqa taban tiredi.

Iýlııanyń jeńisti qadamy 2008 jyldan bastaldy. Ol bul ýa­qytta Eýropanyń eki dúrkin chempıony atandy. 2009 jyly Japonııada ótken álem chempıonatynda tamasha óner kórsetken boıjetken bapkerlerdiń kózine ilikti. Bir­lesip óner kórsetýde álem chempıo­ny atandy. Kanadanyń Van­kýver qala­synda ótken Qys­­qy Olımpııa oıyndaryn­da joly bolmady, sál qate­lik jasap edi, Kanada, AQSh eliniń qa­zylary tó­men qa­raı syrǵyta sal­­dy. Sochı Olım­pıadasyna qaty­syp, jerlesimizdiń ónerin kóz­ben kórgen edik. Iýlııanyń jeńis tuǵyryna kóterilsem degen arma­nyn taǵy da muhıt­tyń arǵy ja­ǵynan kelgen tóre­shilerdiń qıǵanyna kýá boldyq. Keremet she­berlik kórsetken Iýlııany qa­zylar jetinshi orynǵa syr­ǵyta salyp, fınaldyq aıqastan shet­tetti. Ol ol ma, taǵy bir jerle­si­miz Dmı­trıı Reıherdtiń balyn tó­mendetip, úshinshi oryndy re­seı­lik frıstaılshyǵa bere sal­ǵan kezde ózegimizdi órt shaldy. Átteń!..

Budan keıin Iýlııa jer­les­terin abyroıǵa bóledi. Fran­sııa­nyń Merıbel qa­lasynda ótken Álem kýbogynda altynnan alqa taqty. 2015-2016 jyldary álem chem­­pıonatynyń qolasyn, birneshe ret Álem kýbogy saıystarynda top jardy, júlde terdi.

...2011 jyldyń qańtary. Al­matyda VII Qysqy Azııa oıyndary ótip jatyr. Oń­tústik astanada birde qar jaýsa, kelesi kúni aq jaý­yn tolassyz sirkireıdi. Qa­­­lyń tuman tumshalaǵan kezde jarystar birneshe ret ótpeı qaldy. Aqyry aýa raıy ashylǵan soń Iýlııalar saıysqa túsip, jeke mogýlde, paralleldi mogýlde Azııa oıyndarynyń eki dúrkin chempıony atan­dy. Ol ol ma, byltyr Ame­rıkada Álem kýbo­gy jarysynda 2-oryndy, bıyl Almatyda ótken dúnıe­júzilik HHVIII Qys­qy Ýnı­versıada oıyndarynda chempıon atandy. Japonııanyń Sapporo qalasynda jalaýyn kó­ter­gen Azııa oıyndarynda da Iýlııanyń juldyzy jandy.

2017 jyl talantty jer­­lesimiz úshin jeńiske to­ly boldy. Jaqynda ǵa­na Iýlııa Qytaıda ótken Álem kýbogynyń kezekti saıy­synda bir altyn, bir kúmiske ıe bolyp, álem­dik reıtıngte ekinshi orynǵa jaıǵasty. 25 jeltoqsanda bir top óskemendik Iýlııany áýejaıdan qarsy aldy. Ol birer kúnge elge oralyp, odan soń Kanadada ótetin Álem kýbogyna attanbaq.

– Fınlıandııanyń Rýka qala­syn­da ótken Álem kýbogynda jo­lym bolmady. Esesin Qytaı elin­de qaıtardym dep oılaımyn. Armanym – Phenchhanda ótetin Aq Olımpıadada Qa­zaqstannyń týyn jelbiretý. Menimen birge jerlesterim Dmıtrıı Reıherd, 16 jas­taǵy óskemendik óren Aıaý­lym Ámirenova eli­miz­diń namysyn qor­ǵaıdy. Frıs­taıldyń mogýl túri Ka­nada men Amerıkada qat­ty damy­ǵan. Olımpııa oıyn­darynyń bar­lyǵynda sol elderdiń mamandary tóreshilik etedi. Vankýverde, Sochıde de medal alýǵa bir­den-bir úmitker edim. Amal bar ma, muhıttyń arǵy ja­ǵynan kelgen tóreshiler kópe-kórineý qııanat jasady, tobyqtan qaqty. Meniń alǵa qaraı umtylyp, sekiretin ádisimdi álemde birde-bir frıs­taılshy jasaı almaıdy. Osy joly koreı elinde juldyzym janar degen úmit­temin, – dedi Iýlııa bizben áńgi­meleskende.

Bul – Iýlııanyń úshinshi Olım­­pıadasy. Álem kýbogy ja­rys­tarynda san már­te jeńimpaz atan­ǵan, álem chempıonatynyń qola júl­degeri, birneshe dúr­kin Azııa oıyn­dary men Ýnı­­ver­sıadada top jar­ǵan óske­mendik sańlaq qyzdan altyn alqa kútetinimizdi nesin ja­syraıyq.

Ońdasyn ELÝBAI

О́SKEMEN

Sýretti túsirgen avtor