Cýret: Business Insider
Narazylyq sherýi ótken beısenbide Irannyń soltústik shyǵysyndaǵy Meshhed qalasynda bastalyp, juma kúni basqa qalalarǵa tarady. Senbi kúni el astanasy Tegeranda shaǵyn sherý bolyp, oǵan shyqqan stýdentter polısııamen qaqtyǵysty.
BBC habarlaǵandaı, Meshhedte birneshe belsendi «Meniń ómirim Gaza úshin emes, Lıvan úshin emes, Iran úshin» dep aıqaılaǵan. Osy arqyly ırandyqtar el úkimetiniń syrtqy saıasatpen tym qatty áýestenip, eldiń ishindegi jaǵdaıǵa az kóńil bóletinin jetkizip otyr. Iran – Sırııadaǵy Bashar Asadtyń úkimetine áskerı qoldaý bildirip otyrǵan negizgi elderdiń biri. Sondaı-aq, Iran Iemendegi Saýd Arabııasy jetekshiligindegi koalısııaǵa qarsy kúresetin hýsıt kóterilisshilerine qoldaý kórsetip otyr dep aıyptalady. Sonymen qatar, Irannyń Lıvandaǵy Hezbolla tobynyń jaqyn odaqtasy ekeni belgili deıdi BBC.
Al Iran úkimeti bolsa, qarsylyqtyń beleń alýyna «syrtqy agentterdi» jáne antı-revolıýsııashyldardy aıyptap, Instagram jáne Telegram áleýmettik jelilerin buǵattap qoıdy. Jeksenbi keshke el prezıdenti Hasan Roýhanı memlekettik arnalardyń birinen halyqqa beıne habarlama taratyp, «Biz erkin ultpyz jáne konstıtýsııa men adam quqyqtaryna sáıkes halyq synı pikirdi erkin bildire alady, tipti sherýge de shyǵa alady, alaıda syndy bildirý zorlyq-zombylyqpen qatar júrmeýi tıis», dep málimdedi.
