Irandaǵy jergilikti BAQ jurttyń qaı jerde opat bolǵany týraly aqparat taratpady. Al osyǵan deıin alty adamnyń Ize qalasynda kóz jumǵany belgili boldy.
Sherýge shyqqandar el prezıdenti Hasan Rýhanıdiń tártipke shaqyrýyna da qulaq aspady. Iran basshysy óz sózinde azamattar bılikti synǵa alyp, oıyn erkin bildire alatynyn jetkizdi. Sondaı-aq, ol sherý kezinde zorlyq-zombylyqqa jol berilmeıtinin aıtty. Alaıda, tártip saqshylary Tegerandaǵy Enkelab alańynan turǵyndardy qýý úshin kózdi jasaýratatyn gaz, sýatqysh qoldandy. Mundaı sherý Kermanshah, Horremabad, Shahınshehr jáne Zendjan qalalarynda ótti.
Bılik qandaı qadamǵa bardy?
Hasan Rýhanı bılik memleket múlkine zııan keltiretin, qoǵamdyq tártipti buzǵan nemese tártipsizdikke shaqyrǵandardyń qylyǵyna tózbeıtinin eskertti. Tártip saqshylary birneshe kún ishinde 400 adamdy qamaýǵa aldy. Onyń jartysy 1 qańtarǵa qaraǵan túni Tegeranda qamaldy.
Bılik Telegram jáne Instagram jelilerindegi halyqty narazylyqqa shaqyrdy degen akkaýnttardy buǵattap jatyr.
Frans-press agenttiginiń habarlaýynsha memlekettik telearnalar narazylyq sherýlerinen úzindiler kórsetedi. Olardyń arasynda negizinen bankke shabýyl jasaǵan, Iran týyn órtegen sátter jıi kórsetiledi.
Donald Tramp – Hasan Rýhanı
«Irandaǵy iri kóterilister. Jurt aqyry oılandy-aý. Olardyń baılyǵy, aqshasy urlanyp, terrorızmge jumsalyp jatyr. Halyq endi oǵan tózbeıtin sekildi. AQSh adam quqyǵyn buzýshylardy nazarda ustap otyrady», dedi AQSh prezıdenti Donald Tramp Twitter jelisindegi paraqshasynda.
Al oǵan jaýap retinde Hasan Rýhanı AQSh prezıdentin «Irannyń jaýy» degen málimdeme jasady.
Halyqtyń jaǵdaıy 15%-ǵa nasharlady
BBC málimeti boıynsha Iran halqynyń sońǵy on jylda jaǵdaıy 15%-ǵa nasharlaǵan. Naryzylyq sheýlerine kóbine jastardan jınalǵan toptar qatysyp jatyr. Olar klerıkaldyq rejimdi qulatýdy talap etedi. Sonymen qatar, keıbiri monarhııany qaıtyp ornatýdy talap etti.
Aksııalar Irannyń shaǵyn qalalaryna da tarap ketti. Aldaǵy ýaqytta kólemi artýy múmkin. Degenmen sherýshilerdiń arasynda naqty bir kóshbasshylary joq. Al oppozııa basshylary áldeqashan repressııaǵa ushyraǵan nemese elden qýylǵan.
2009 jyly ne boldy?
2009 jyly saılaý kezinde prezıdent laýazymyna Mahmud Ahmadınejada otyrǵany kópshiliktiń narazylyǵyn týdyrdy. Saldarynan narazylyq aksııalary ótip, oǵan «Jasyl qozǵalys» degen ataý berildi. Sol tusta oppozısııany mıllıondaǵan adam qoldady.
Sherý kezinde keminde 30 adam qaza taýyp, myńdaǵan turǵyn qamaýǵa alyndy. Bul Iranda 1979 jyly Islam revolıýsııasynan keıin tirkelgen eń iri sherý boldy.
