Táýelsizdikpen tustas kásiporyn

«Kókshetaýmıneraldysýlary» AQ bıyl óziniń 20 jyldyǵyn atap ótýde. Qazaqstan Táýelsizdiginiń tól qurdasy ári soltústik óńirdegi sýsyn ındýs­trııa­sy­nyń qarlyǵashy sanalatyn za­manalyq kásiporyn qazirgi tańda Kók­shetaý qalasy boıynsha salyq túsi­miniń 40 paıyzyn, respýblıkamyz­daǵy alkogoldi óndiris salyǵynyń 35 paıyzyn qamtamasyz etýde. Áleýmet­tik baǵdar ustanatyn seriktestik 1000 adamǵa turaqty nápaqa kózin ashýmen qatar, qýatty da salamatty qoǵam or­natý, adamdardyń ómir capasyn jaq­sartý mindetin abyroıly paryz sanaıdy. Táýelsizdikke qol jetkizgen Qazaq­stan úshin toqsanynshy jyldar kút­pegen qıyndyqtardy ala kelgenimen, barshamyz úshin qymbatty da qasterli kezeń edi. Bıik maqsattaǵy qoǵam «óz arbasyn» ózi súreı bastady. Alǵa um­tyl­ǵandardyń alǵy sapynan polıteh­nıkalyq ınstıtýtty jańa ǵana bitirgen Asqar Álıev pen onyń alty geolog joldastary kóringende kóńil jylyǵan. Mıneraldy sýdy «qyrym men qytaıdan» tasyp ishetin kókshe­likter qolda bardyń qadirin endi bilgendeı. Áıgili Býrabaıdan, Zerendiden tunba bulaqtardyń kózi ashylyp, «Turan», «Qulager Arasan» sýsyny, «ashy sýdan» «Haoma» shyǵa bastady. Atyn kórmeısiz be?! Zaty da solaı. Zamanaýı tehnologııany qoldaný, sapany baqylaý jáne menedjment pen óndiris qaýipsizdiginiń ozyq júıesin qalyptastyrý tıimdilikti arttyrdy. Talaı báıgeniń tórinen tabylǵan ká­siporyn 100 ataýly ónim shyǵarsa, jeńip alǵan altyn medaldarynyń ózi 75 bolyp otyr. Al onyń basshysy Asqar Qazynabıuly «Onjyldyqtyń úzdik kásipkeri» atanyp, omyrýyna «Qurmet» ordenin taqty. «Kókshetaý­mı­neraldysýlarynyń» búginderi Sol­tústik jáne Ortalyq Qazaqstanda 10 fılıaldyq, Ońtústik jáne Batys Qazaqstanda 9 destrıbıýterlik jelisi qurylsa, Reseı Federasııasynda saýda ókildigi jumys isteıdi. Astana qa­lasynyń 77 mektebi men 36 balabaq­shasyn qamtıtyn «Balalarǵa shattyq syılar bıogendi sý» qanatqaqty jo­basy 2009 jyldan beri júzege asy­rylýda. Byltyr údemeli ındýs­trııa­lyq-ınnovasııalyq damý baǵdarla­masy sheńberinde Germanııanyń Krones alkogolsiz sýsyndar jelisi iske qo­syldy. Nebári 10 aıda paıdalanýǵa berilgen jańa jeliniń ónimdiligi saǵa­tyna 12000 qutyǵa teń. Qazir kósh­basshy fırma 61 sýsyndar men 43 alkogoldi ónimder brendin usyna ala­dy. Bıylǵy 1 qazanǵa deıin munda 9446099278 teńgeniń ónimi satylsa, bıýdjetke 2902945011 teńgeniń saly­ǵy aýdaryldy. Dırektorlar keńesiniń tóraǵasy Asqar Álıev pen prezıdenti Aleksandr Samoılov basqaratyn kásip­oryndy kókshelikter «qolaılylyq araly» dep te ataıdy. Qaladaǵy árbir otyzynshy otbasynyń múshesi eńbek etetin yntymaqty ujymdaǵy áleý­mettik kómek ataýlarynyń ózi jıyr­maǵa jetip otyr. Al jumysshylardyń aılyq jalaqysy 99626 teńgeden aınalýda. Elbasy N.Nazarbaev 2011 jyly kásiporynnyń 10 jyldyq toıyna qatysqan kezinde qurmetti qonaqtar kitabyna: «Eńbekteriń tabysty bolsyn!» degen jyly sózderin jazǵan edi. Tabys eselene túsýde. Baqbergen AMALBEK.