Jalpy, Joldaýda aıtylǵan mańyzdy máseleler Qazaqstan úshin tyń jobalardy qolǵa alýdyń múmkindikteri bolyp qana qoımaı, álemniń eń damyǵan memleketteriniń qataryna qosylýǵa da yqpal etetin júıe ekeni anyq. Ásirese agrarly-ındýstrııalyq aımaq sanalatyn Jambyl óńiri úshin Tórtinshi ónerkásiptik revolıýsııa ónerkásipti órkendetýdiń taptyrmas joly bolyp otyr. Kásiporyndardy avtomattandyrý, eńbek ónimdiligin arttyrý, barlyq salaǵa sıfrly júıeni engizý máselesi búginde kún tártibinde. Bul máselede oblysta tıisti alǵysharttar jasalǵan.
Elbasy Joldaýynda kórinis tapqan barlyq salany sıfrlandyrý mindeti oblys kásiporyndarynda sıfrly tehnologııalardy engizý jumystary arqyly júzege asýda. Máselen, otandyq hımııa óndirisin damytýda aıryqsha mańyzǵa ıe «Qazfosfat» jaýapkershiligi shekteýli seriktestigi jańa tehnologııalardy engizý, kúrdeli jóndeý jáne qaıta jaraqtandyrý kezinde jumys istep turǵan qurylǵylardy jańǵyrtý maqsatynda 2011-2020 jyldarǵa arnalǵan jańǵyrtý josparyn ázirlegen. Sonymen qatar osy kezeńde 29,4 mıllıard teńgeni quraıtyn 11 iri ınvestısııalyq jobany júzege asyrý kózdelse, onyń 1,2 mıllıard teńgesi tehnologııalyq prosesti avtomattyq júıede basqarýǵa arnalǵan.
Elbasy Joldaýynan týyndaıtyn mindetterdi júzege asyrý barysynda óńir ónerkásibin avtomattandyrýǵa jáne kompıýterlendirýge umtylys jasap otyrǵan birqatar kásiporyndar bar. «Sıfrly kenish» jobasyn qolǵa alǵan «Altynalmas» kompanııasy sıfrly ınnovasııanyń kómegi arqyly ónimdilik pen kiristi arttyrýdy jáne shyǵyndardy 15 paıyzǵa deıin azaıtýdy kózdep otyr. Al «Orgstroı» jaýapkershiligi shekteýli seriktestigi jańa tehnologııanyń kómegimen bloktardy jarylyssyz ázirleýde gıps, mármár jáne granıt óndirý jobasyn qolǵa alyp keledi.
Memleket basshysy Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri jaıly aıtqan Joldaýynda ónerkásip keshenin jańa tehnologııalyq deńgeıge jetkizý mindetin qoıdy. Bul óz kezeginde agrarlyq saladaǵy eńbek ónimdiligin arttyrýǵa, sondaı-aq, óńdelgen ónimniń eksportyn ulǵaıtýǵa da múmkindik beredi. Ásirese bul bastama sharýa qojalyqtary úshin tıimdi bolmaq. Máselen, Qordaı aýdanyndaǵy «Samǵaý» sharýa qojalyǵy «Djon Dır» markaly traktoryna GPS baqylaý tehnologııasyn engizip, egin sharýashylyǵyn ıntensıvtendirýdi qolǵa alyp otyr. Al «Grın Vıll» jaýapkershiligi shekteýli seriktestigi Ońtústik Koreıa ınvestorlarymen birlesý arqyly 4 gektar óndiristik jylyjaıdy klımatty baqylaý jáne ylǵaldandyrý prosesterin kompıýterlik baqylaý júıesine negizdep, avtomattandyrǵan. Endi atalǵan seriktestik Jambyl aýdany, Aısha bıbi aýyldyq okrýginde ınnovasııalyq akvaponıkalyq ádispen 1 gektar jerge jylyjaı salýdy josparlaýda. Aldaǵy ýaqytta jylyjaılarda ósimdiktiń 50 túrinen jylyna 800 tonnaǵa deıin ónim óndiriledi.
О́ńir ónerkásibindegi ózgerister órleýge bastaıdy. Búginde álemniń damyǵan memleketterinde tehnologııalyq múmkindikterdi paıdalaný, ıgerý arqyly damý kórsetkishine qol jetkizilip keledi. Elbasy óz Joldaýynda osy máselerdi aıta otyryp, otandyq ónerkásiptiń órleý kezeńin qalyptastyrýdy mindettedi. Al óńirlerde ónerkásiptiń órleý múmkindigi joǵary bolǵan jaǵdaıda, serpindilik strategııasyn qalyptastyrýǵa bolady.
Hamıt Esaman,
«Egemen Qazaqstan»
Jambyl oblysy
