Atalǵan nysandardyń qurylysy eki jyl buryn qolǵa alynǵan bolatyn. Mysaly, KBKB Krasnogor kenishiniń №17 jańa karerindegi ken jynystaryn ashý jumystary 2016 jylǵy qańtarda bastalǵan edi. Táýligine 18 myń tekshe metr shamasynda ken jynysy tıelip, shyǵarylyp otyrdy. Uzyndyǵy – 2 shaqyrym, eni – 0,9 shaqyrym, tereńdigi 111 metr karerden arshylatyn jynystyń jalpy kólemi 53 mln tekshe metrden astam bolatyn. Onyń qurylysymen qatar boksıt tógetin qoımaǵa aparar kólik joly tóselip, sý tartqysh jáne kerneýi 6 kV elektr qýatynyń úsh jelisi tartyldy. Qazir №17 karerdegi taza kenniń alǵashqy tonnasy óndirildi. Jyl basynan jumys úderisi qarqyn aldy. Oǵan bes ekskavator, toǵyz avtosamosval, úsh býldozer men bir avtogreıder iske jumyldyrylǵan. Osy karerden jylyna 1 mln tonnaǵa deıin boksıt kenin óndirý josparlanyp otyr.
Al Aıat kenishiniń №9 karerinde boksıt óndirisi qańtar aıynyń sońynda bastalmaq. Bul karerdiń uzyndyǵy – 700 metr, eni – 600 metr, tereńdigi 119 metr bolady. Jarylys jumystarynan keıin boksıt kenin óndirý qolǵa alynady. Avtojol, sorǵy stansasy, sý burǵysh, elektr qýaty jelisi, jaryqtandyrý úshin baǵandar qurylysy aıaqtalǵan. Búginniń ózinde karerde eki ekskavator, tórt avtosamosval, býldozer jáne avtogreıder jumys isteýde.
– Kenishterdegi karerlerdi jańǵyrtý qurylysyna 6 mıllıard teńgeden astam ınvestısııa jumsaldy. Joba Aıat jáne Krasnogor kenishteri qýatyn jáne shahtanyń sapaly kórsetkishterin saqtaý, 2018 jylǵa arnalǵan óndiristik jospardy tolyq oryndaý úshin júzege asyryldy. Biz óndiristik kórsetkishterdi oryndaýǵa jáne Pavlodar alıýmınıı zaýytyna boksıtti jetkizýge daıynbyz, – dedi «Qazaqstan alıýmınııi» AQ fılıaly – Krasnooktıabr boksıt ken basqarmasynyń dırektory Sergeı Shelokov.
Qazir Krasnooktıabr boksıt ken basqarmasynyń Shyǵys Aıat ken ornynda taǵy bir karerdiń qurylysy júrip jatyr. Kenishterdegi mundaı jańǵyrtý qurylys jumystary 2020 jylǵa deıin jalǵasady.
Názıra JÁRIMBET,
«Egemen Qazaqstan»
Qostanaı oblysy,
Lısakov qalasy
