Jıynda bas qosqan Qazaqstan halqy Assambleıasynyń ókilderi men birqatar qurylymdardyń basshylary eldiń strategııalyq damýyn aıqyndap bergen basty qujattyń mán-mańyzyna úńilip kórdi.
Dóńgelek ústel jumysyn ashyp bergen Qazaqstan halqy Assambleıasy Tóraǵasynyń orynbasary – Qazaqstan Respýblıkasy Prezıdentiniń QHA hatshylyǵynyń meńgerýshisi Darhan Myńbaı Joldaýda aıqyndalǵan maqsat-mindetterdiń júzege asýy jolynda Assambleıa atqaratyn jumystardyń salmaǵyn saralap berdi. Ol jańa Joldaý Memlekettiń barlyq salasyndaǵy damýdyń jańa sapalyq deńgeıge kóterilýine kedergi keltiretin áreketterge tosqaýyl qoıyp, sıfrlyq damý dáýirine aparatyn aıqyn jol dep atap ótti. Ásirese, Joldaýdan týyndaıtyn maqsattardy iske asyrýda jastardyń jan-jaqty jetilýine jaǵdaı jasaýǵa Assambleıa tarapynan erekshe basymdyq beriletinin aıtyp, bıyl qoǵamdyq-saıası baǵytta Assambleıa qolǵa alatyn on bir jobanyń barlyǵy jastarǵa arnalatynyn tilge tıek etti.
– Prezıdent Joldaýy asa bir tarıhı kezeńde halyqqa joldandy. Onda qamtylǵan negizgi máseleniń biri – adam kapıtalyn damytý. Adam kapıtaly degenimizde eń birinshi oıǵa keletini adamnyń bilim alýy. Biz álemdik deńgeıge shyǵý úshin, órkenıettiń kóshinen qalyp qoımaý úshin shet tilderin bilýmen ǵana shektelip qalmaı, kóptegen ozyq tehnologııalardy meńgerýimiz kerek. Ol úshin jastarǵa jol ashý, olardyń jan-jaqty bilim alyp damýyna qoldaý kórsetýdiń mańyzy zor. Biz aldaǵy sáýir aıynda barlyq jastar birlestikteriniń jetekshilerin Astanaǵa jınap, «Jańǵyrý joly» qozǵalysynyń jumysyn bastaımyz. Arnaıy shtab qurylyp, onyń atqaratyn jumysy naqtylanady. «Jańǵyrý joly» qozǵalysy «Rýhanı jańǵyrý», «Qazaqstannyń úshinshi jańǵyrýy: jahandyq básekege qabilettilik» baǵdarlamasyndaǵy mindetter arqyly jastardyń damýyn qamtamasyz etedi. Assambleıanyń 26-shy sessııasyn ótkizgennen keıin, biz «Jańǵyrý joly» respýblıkalyq forýmyn ótkizemiz. Onda QHA tarapynan ázirlengen jastardyń áleýmettik jobalaryn tanystyramyz. Elbasymyz aıtqandaı, «Elimizdiń álemdik ekonomıkadaǵy tabystarynyń negizi bizdiń basty qundylyqtarymyz retinde qala beretin azamattyq beıbitshilik, ultaralyq jáne konfessııaaralyq kelisim». Elbasy atap kórsetken ulttardyń tatýlyǵy men birligi árdaıym basty nazarda. Qazaqstandy mekendegen barlyq halyqty ultyna, dinine qaramaı biriktire túsýimiz kerek. О́ıtkeni bir múdde jolynda judyryqtaı jumylǵanda ǵana biz úlken jetistikterge qol jetkize alamyz, – dedi Darhan Myńbaı.
Memleketti damytýda zamanaýı talaptar men órkenıettiń jahandyq kórinisine saı áreket etýdi baǵdarlaıtyn bul qujattyń mazmuny da, qoǵam aldyna júkter jaýapkershiligi de salmaqty. Osyǵan oraı óz pikirin bildirgen Almaty Káris ulttyq ortalyǵy tóraǵasynyń orynbasary Georgıı Kan: «Prezıdentimizdiń jańa Joldaýy memleketimizdiń damý jolyndaǵy úlken umtylystaryn kórsetedi. Atalǵan joldaýda ekonomıkamyzdyń órleýine yqpal etetin ár sektor jeke-jeke kórsetilip, olardy ary qaraı jetildirý men damytýdyń naqty maqsattary atap aıtylǵan. Qazaqstan halqynyń ál-aýqatyn arttyrý, adam kapıtaly, siz ben bizdiń salaýatty ómir súrýimiz, bári-bári qamtylǵan. Joldaýda nysanǵa alynǵan ár máseleniń mańyzy zor» dep atap ótti.
Shara barysynda sóz alǵan QHA qarasty etnomádenı birlestikterdiń basshylary da Prezıdent Joldaýyna qoldaý bildirip, onda kórsetilgen baǵyttar men kózdelgen maqsattar barlyq qoǵam múshelerin biriktire túsetin kúsh ekenin aıtty.
Arman OKTIаBR,
«Egemen Qazaqstan»
