Habarlamaǵa súıensek, qor Joldaýdaǵy eń mańyzdy úsh mindetke basymdyq bermek. Birinshisi, aqparattyq júıeler men mobıldi qosymshalardy damytý arqyly medısınalyq kómektiń qoljetimdiligi men tıimdiligin qamtamasyz etý. Eske sala keteıik, byltyr qarasha aıynda qordyń mobıldi qosymshasy iske qosylǵan bolatyn. «MSQ: Halyqtyq baqylaý» dep atalatyn qosymsha elimizdegi aýrýhanalar men emhanalar qyzmetin baǵalaýǵa múmkindik beredi. Qosymshany uıaly telefonǵa júktep, kepildendirilgen tegin medısınalyq kómek sheńberinde qyzmet kórsetetin emdeý mekemeleriniń jumysyna baǵa berýge bolady. Emhana nemese stasıonar qyzmeti dáriger qabyldaýyna kirýge ketken ýaqyt, kórsetilgen qyzmet sapasy, dáriger bergen emniń túsiniktiligi syndy ólshemder negizinde baǵalanady. Sonymen qatar qosymshany paıdalanýshylar kez kelgen medısına uıymy jaıly pikirin erkin túrde jazyp qaldyra alady. Aldaǵy ýaqytta osy pikirler negizinde klınıkalardyń reıtıngi jasalady. Al bul azamattarǵa elimizdegi eń úzdik emhanalar men klınıkalardy tańdaýǵa kómektespek. «Halyqtyq baqylaý» qosymshasyn Android jáne iOS platformalarymen jumys isteıtin smartfondarǵa ornatýǵa bolady. Mobıldi qosymsha únemi jańartylyp, tolyqtyrylyp otyrmaq. Aldaǵy ýaqytta oǵan emhanaǵa tirkelý, medısınalyq qyzmet sapasyn baǵalaý, dáriger qabyldaýyna jazylý syndy fýnksııaardy qosý kózdelip otyr, deıdi qordyń baspasóz qyzmeti.
Ekinshisi, kepildendirilgen tegin medısınalyq kómek kólemin ońtaılandyrý. Jalpy, bul qujat Úkimet tarapynan bekitiledi. Biz óz usynystarymyzdy ázirlep ókiletti organǵa beremiz. Bir sózben aıtqanda, kepildendirilgen tegin medısınalyq kómek paketi qaıta qaralady deýge bolady. Bolashaqta memleket úshin tıimdiligi tómen ári shyǵyny kóp dıspanserlik júıeden bas tartyp, onyń ornyna sozylmaly syrqattardy qashyqtyqtan dıagnostıka jasaý jáne ambýlatorlyq emdeý tásilderin paıdalaný arqyly emdeý júıesine kóshý kózdelip otyr, delingen habarlamada.
Aldaǵy eki jylda qor kepildendirilgen tegin medısınalyq kómek pen áleýmettik medısınalyq saqtandyrý paketterine kiretin qyzmet túrlerin irikteýmen aınalyspaq. Irikteý barysynda medısınalyq qyzmetterge degen suranys pen olardyń tıimdiligi mindetti túrde eskeriledi.
Úshinshiden, stasıonarlyq kómekten profılaktıkaǵa jáne ózge de qyzmet túrlerine kóshý. Memleket basshysy bıylǵy Joldaýynda qazirgi densaýlyq saqtaý júıesiniń baǵasy qymbat bolyp keletin stasıonarlyq emge emes, aýrýdyń aldyn alýǵa den qoıýy kerektigin qadap aıtty. Sebebi elimizde naýqastardyń 70 paıyzy dárigerge aýrýy ábden asqynǵannan keıin qaralady. Sonyń saldarynan azamattardyń shyǵyny men memleket qaltasynan shyǵatyn qarajat birneshe ese artady. Bul rette bolashaqta stasıonardy almastyratyn qyzmet túrlerin kóbeıtýge, soǵan basymdyq berýge kúsh salynbaq. 2018 jyldan bastap kepildendirilgen tegin medısınalyq kómekke bólinetin qarajattyń 5 paıyzy osy qyzmet túrlerine jumsalatyn bolady. Sonymen qatar profılaktıkalyq is-sharalar aýqymyn edáýir arttyrý kózdelip otyr.
Al ózin-ózi jumyspen qamtyǵandar medısınalyq qyzmetke qalaı qol jetkizedi? Bıylǵy Joldaýda halyqty laıyqty áleýmettik qorǵaý júıesin qurý jáne sapaly jumyspen qamtý problemasy aıtylǵany belgili. Memleket basshysy bul máseleni sheshý úshin azamattardyń múmkindikterin arttyrý qajettigin, ózin-ózi jumyspen qamtyǵandardy tirkeý úderisin jeńildetý kerektigin aıtty. Iаǵnı qolaıly jaǵdaı jasalsa azamattar úshin memleket aldyndaǵy mindetterin qaltqysyz oryndaý tıimdi bolary sózsiz.
Qazirgi ýaqytta memlekettik organdar Prezıdenttiń ózin-ózi jumyspen qamtyǵan halyqty ekonomıkaǵa jumyldyryp, áleýmettik medısınalyq saqtandyrý júıesine tartý týraly tapsyrmasyna sáıkes birqatar is-sharalar legin ázirledi. Atap aıtsaq, zań aktilerinde «ózin-ózi jumyspen qamtyǵan» túsinigin naqtylaý, óz kúnin ózi kórip júrgen azamattardy memlekettik tabys organdarynda tirkeý tártibin jeńildetý, olardan salyq óndirý tártibin aıqyndaý, ózin-ózi jumyspen qamtyǵandar men jumyssyz azamattardy tirkeıtin mekemeler qyzmetin tolyǵymen sıfrlandyrý, jergilikti atqarý organdary men ortalyq memlekettik organdardyń aqparattyq júıelerin bir-birimen yqpaldastyrý kózdelgen. Oǵan qosa, ózin-ózi jumyspen qamtyǵan azamattarǵa az mólsherde jarna tólep, MÁMS paketin tolyq paıdalanýǵa múmkindik beriletinin de aıta ketkenimiz jón.
Dýman ANASh,
«Egemen Qazaqstan»
