Jıynǵa Parlament Májilisiniń depýtattary, Konstıtýsııalyq komıssııa músheleri, azamattyq qoǵam ókilderi, bastaýysh partııa uıymdarynyń belsendileri jáne partııanyń óńirlerdegi Áıelder qanatynyń músheleri qatysty.
«AMANAT» partııasynyń Hatshysy, Áıelder qanatynyń tóraǵasy Sholpan Karınova moderatorlyq etken dóńgelek ústelde jańa Konstıtýsııa jobasynyń áıelder úshin aıryqsha mańyzǵa ıe ekenin atap ótti.
Onyń aıtýynsha, bul qujat áıelderdiń qoǵamdyq ómirge aralasýy, kásibı damýy men saıası belsendiligine tikeleı yqpal etedi.
«Jańa Konstıtýsııa tek zańgerlerge nemese saıasatkerlerge arnalǵan qujat emes. Bul – ár azamattyń, ár qazaqstandyqtyń, ásirese ár áıeldiń kúndelikti ómirine tikeleı áser etetin negizgi qoǵamdyq kelisim. Konstıtýsııa azamattardyń bilim alýǵa, eńbek etýge, basqarýǵa, sheshim qabyldaýǵa jáne densaýlyq saqtaý júıesine qatysýyna teń múmkindik beredi. Biz Konstıtýsııa jobasyn áıeldik tájirıbe, jaýapkershilik jáne azamattyq ustanym turǵysynan qarastyramyz. Sebebi áıelderdiń qatysýynsyz ádiletti qoǵam qurý múmkin emes, al ádiletti qoǵam Konstıtýsııadan bastalady», dedi Sholpan Karınova.
Talqylaý barysynda Konstıtýsııa jobasynda teń múmkindikter qaǵıdattary bekitilip, azamattyq qatysý tetikteri kúsheıtilgeni, otbasyn, anany jáne balany qorǵaý kózdelgeni, sondaı-aq sıfrlyq dáýirdiń syn-qaterlerine, onyń ishinde derbes derekterdi qorǵaý men jeke ómirge qolsuqpaýshylyq máselelerine jaýap beretin normalar qamtylǵany aıtyldy.
Parlament Májilisiniń depýtaty, Konstıtýsııalyq komıssııa múshesi Únzıla Shapaq jańa Konstıtýsııa jobasynyń qurylymy men negizgi jańashyldyqtaryna jan-jaqty toqtalyp, preambýlanyń jańartylýyn, memleket qyzmetiniń irgeli qaǵıdattarynyń bekitilýin, sondaı-aq qujattyń halyqaralyq standarttarǵa sáıkestigin atap ótti. Sonymen qatar konstıtýsııalyq prosestiń ashyq ári ınklıýzıvti sıpatyna jáne Konstıtýsııalyq komıssııa jumysyna áıelderdiń belsendi qatysýyna erekshe nazar aýdardy.
«Konstıtýsııalyq komıssııanyń jumysynda áıelderdiń úni tolyqqandy ári mazmundy estilip jatyr. Onyń quramynda «AMANAT» partııasynyń Áıelder qanatynan úsh ókil jumys istep, naqty ári salmaqty usynystar engizip otyr. Konstıtýsııa jobasynda neke áıel men er adamnyń erikti ári teń quqyly odaǵy retinde aıqyndalǵan, onyń negizinde taraptardyń erkindigi men teńdigi jatyr. Konstıtýsııanyń árbir normasy búkil zańnama júıesine tıgizetin yqpalyn eskere otyryp qarastyrylýda», dedi Únzıla Shapaq.
Parlament Májilisiniń depýtaty, Konstıtýsııalyq komıssııa múshesi Vera Kım jańa Konstıtýsııa jobasy boıynsha jumys birneshe aı boıy júrgizilip jatqanyn jáne keń qoǵamdyq talqylaýǵa negizdelgenin atap ótti. Ol qoǵamdyq qatysýdyń jańa ınstıtýttaryn qalyptastyrýǵa jáne memleket pen qoǵam arasyndaǵy turaqty dıalog modeline kóshýge erekshe mán berdi.
Egemendik pen aýmaqtyq tutastyq Konstıtýsııa jobasynda ózgermeıtin qundylyq retinde bekitiledi
«Jańa Konstıtýsııa jobasy jabyq formatta emes, qoǵammen ashyq dıalog negizinde ázirlenedi. Osy ýaqyt ishinde shamamen tórt myńǵa jýyq usynys kelip tústi jáne olardy talqylaý jalǵasyp jatyr. Jobada jańa konstıtýsııalyq ınstıtýt – Halyq keńesi engiziledi. Ol qoǵamnyń strategııalyq sheshimderdi talqylaýǵa qatysýynyń jalpyulttyq arnasyna aınalady. Bul –memleket pen qoǵam birlesip el damýynyń negizgi baǵyttaryn aıqyndaıtyn jańa modelge kóshý», dedi Vera Kım.
Májilis depýtaty Ekaterına Smyshlıaeva óz sózinde sıfrlandyrý jaǵdaıyndaǵy adam quqyqtary men konstıtýsııalyq kepildikter máselesine toqtaldy. Onyń aıtýynsha, jańa Konstıtýsııa jobasynda alǵash ret sıfrlyq tehnologııalardy paıdalana otyryp, derbes derekterdi qorǵaý jáne hat almasý qupııalylyǵy quqyǵy bekitilip otyr.
Jańa Konstıtýsııa jobasyn talqylaý barysynda jekemenshik bilim berý uıymdary qaýymdastyǵynyń tóraǵasy, advokat Dınara Qudaıqulova advokatýranyń erekshe mártebesin Konstıtýsııalyq deńgeıde bekitýdi kózdeıtin 86-bapqa nazar aýdardy. Onyń sózinshe, jańa normalar ádil sot júıesindegi advokattardyń rólin kúsheıtip, salalyq zańnamanyń sapasyn arttyryp, azamattardyń quqyqtaryn sot arqyly qorǵaý kepildikterin nyǵaıtady.
«AMANAT» partııasynyń Mańǵystaý oblysy boıynsha Áıelder qanatynyń jetekshisi, oblystyq máslıhattyń áleýmettik máseleler jónindegi komıssııa tóraǵasy Panııa Sarmurzına jańa Konstıtýsııa jobasy jergilikti ózin-ózi basqarýdy keńeıtýge, basqarý ashyqtyǵyn arttyrýǵa quqyqtyq negiz qalyptastyratynyn atap ótti. Sonymen qatar ol óńirde júzege asyrylyp jatqan ınfraqurylymdyq jáne áleýmettik jobalarǵa, sondaı-aq áıelder men otbasylardy qoldaýǵa baǵyttalǵan partııanyń Áıelder qanatynyń bastamalaryna nazar aýdardy.
Sholpan Karınova qorytyndylaı kele, negizgi zań jobasy keń qoǵamdyq dıalog aıasynda qalyptasyp, azamattardyń naqty suranystaryn eskeretinin atap ótti.
«AMANAT» partııasynyń Áıelder qanaty alańynda ótken talqylaý áıelder, balalar jáne otbasy quqyqtaryn qorǵaý turǵysynan usynylǵan ózgeristerdi qarastyrýǵa múmkindik berdi. Kezdesý qorytyndysy boıynsha partııanyń Áıelder qanaty jańa Konstıtýsııa jobasyn qoldaıtynyn bildirip, óńirlerde túsindirý jumystaryn jalǵastyrýǵa daıyn ekenin jetkizdi.
