О́z sózin Konstıtýsııalyq komıssııa tóraǵasynyń orynbasary reformaǵa qatysty túrli hat pen pikir kelip túskeninen bastady.
Onyń pikirinshe, jańa Ata zańnyń qajettiligimen mańyzyn kópshilik durys qabyldap jatyr eken.
Qoldaý kórsetken barsha azamattarǵa Konstıtýsııalyq komıssııa atynan alǵys aıta otyryp, Erlan Qarın ózge de pikir aıtýshylardyń baryn jetkizdi.
«Jańa Konstıtýsııany áýre bop qabyldaýdyń qandaı qajeti bar edi?» nemese «Eski Ata Zań qala bersin» deıtin pikirler de kezdesip jatyr» dep aıta kele ol árbir otyrysta qoǵammen keri baılanys ornatyp, týyndap otyrǵan suraqtarǵa únemi ún qatyp júrgenine nazar aýdardy.
Myńjyldyq tarıhtyń sabaqtastyǵy – jańa Konstıtýsııa jobasy aıqyndap bergen baǵdar
Bul joly da Memlkettik hatshy týyndaǵan birqatar suraqtarǵa jaýap berip, mysal retinde 1995 jyly qabyldanǵan qoldanystaǵy Konstıtýsııadan bir úzindi oqyp berdi.
«Qazirgi Ata Zańnyń 13-baby 1-tarmaǵynda bylaı dep jazylǵan: «Árkimniń quqyq sýbektisi retinde tanylýyna quqyǵy bar jáne óziniń quqyqtary men bostandyqtaryn, qajetti qorǵanysty qosa alǵanda, zańǵa qaıshy kelmeıtin barlyq tásildermen qorǵaýǵa haqyly». Osydan ne túsinýge bolady?», dep surady ol.
Onyń pikirinshe, muny birneshe ret oqyǵan adam da, tyńdaǵan adam da eshteńe túsinbeıdi. Al mundaı túsiniksiz sóılemderdi, uǵynyqsyz sózderdi qoldanystaǵy Atań zańnyń kóptegen baptary men tarmaqtarynan kezdestirýge bolady.
«Asyra aıtqandyq emes, biraq 1995 jyly qabyldanǵan qoldanystaǵy eski Konstıtýsııa men jańa Ata Zańnyń arasyndaǵy mazmundyq, ustanymdyq, maǵynalyq, jańashyldyq, tildik, redaksııalyq turǵydan aıyrmashylyq birshama. Jańa Konstıtýsııany, ondaǵy jańa mátindi jas ta, úlken de túsinip, qabyldaı alatyn bolady. Eń bastysy – osy», dedi Erlan Qarın.
Sóz sońynda Konstıtýsııalyq komıssııa tóraǵasynyń orynbasary mundaı jańashyldyqty jan-jaqty túsindirý kerektigin aıta kele, eldik isterge aqylmen, syndarly kózqaraspen, naqty jumyspen, jasampazdyqpen kirisý mańyzdy ekenin atap ótti.
