«Egemen Qazaqstan» gazeti jańa maýsymda qazaq klýbtarynyń qataryna qosylǵan keıbir legıoner fýtbolshylardy keńinen tanystyrýdy bastaıdy. Kóptiń ortasynan kózge túsip, toptyń ortasynan tóbe kórsetedi degen úmitpen. Búgingi keıipkerimiz – Djaba Kankava.
2014 jyl. Dnepropetrovsk qalasy. Jergilikti «Dnepr» men Kıevtiń «Dınamosy» arasyndaǵy mańyzdy oıyn. Kezdesýdiń bel ortasynda kútpegen jaǵdaı boldy. Qonaqtar shabýylshysy Oleg Gýsev qarsylas komandanyń qaqpashysy Denıs Boıkamen dopqa talasta qatty qaqtyǵysty. Basynan aýyr soqqy alǵan Gýsev álgi jerde esinen tanyp qaldy. Sol ýaqytta fýtbolshyǵa alań ıeleriniń oıynshysy der ýaqytynda alǵashqy kómek kórsetip, ólimnen arashalap qaldy. Dárigerlerdiń aıtýynsha, alǵashqy kómek der kezinde kórsetilmegende Gýsevtiń ómirine qaýip tónip turǵan eken. Ýkraın fýtbolshysynyń ómirin qutqaryp qalǵan – Djaba Kankava edi. Sol oqıǵadan keıin Ýkraınanyń kez kelgen qalasynda Kankavaǵa degen qurmet, jankúıerlerdiń ystyq yqylasy arta tústi. Ajalǵa arasha bolǵan Kankava adamgershilik turǵysynan da óziniń myqtylyǵyn kórsetti.
– Meniń ornymda kez kelgen adam solaı isteýshi edi, munymdy erlikke sanamaımyn. Eń bastysy, bári durys aıaqtaldy. Qolymnan kelgenin jasadym, – degen edi sol kezde fýtbolshy.
Grýzın fýtbolshysy kúni keshe ǵana Qostanaıdyń «Tobylymen» kelisimshartqa otyrdy. Djaba Kankava týraly kóp nárse aıtýǵa bolady. Grýzııa ulttyq quramasynyń kapıtany. Birneshe ret óz eliniń úzdik fýtbolshysy atanǵan. Grýzııada tanymaldyǵy jaǵynan áıgili Kahaber Kaladzeden kem túspeıdi.
Ataqty «Dınamo» (Tbılısı) fýtbol klýbynyń túlegi «Dneprde» de keremet oıyndarymen kózge tústi. Ýkraın komandasy 2014-2015 maýsymynda Eýropa fýtbolynda atoı saldy. Kuramynda Konoplıanka, Rotan, Kankava sııaqty myqtylar jınalǵan Dnepropetrovsk jigitteri azýly «Olımpıakos», «Aıaks», «Napolı» komandalaryn jeńip, Eýropa lıgasynyń fınalyna deıin jetti. Tek fınalda ǵana ataqty «Sevılıaǵa» jol berdi.
Djaba Kankava – qorǵanysqa jaqyn oınaıtyn jartylaı qorǵaýshy. Osyǵan deıin «Dınamo» (Tbılısı), «Alanııa» (Vladıkavkaz), «Arsenal» (Kıev), «Dnepr» (Dnepropetrovsk) komandalarynda oınaǵan. Fýtbolshynyń sońǵy oınaǵan komandasy – Fransııanyń «Reıms» ujymy. Fransýzdarmen úsh jyldyq kelisimshartqa otyrǵan edi. Alaıda birjarym jyldan keıin «Reımsten» ketýine májbúr boldy. Komandanyń tómengi lıgaǵa túsip qalýy Kankavanyń umtylysyna, oıynyna da keri áserin tıgizdi. Fransııadan ketken soń Djabaǵa «Mets», «Nıssa» «Malaga» komandalary qyzyǵýshylyq tanytqan. Kóktemde atalǵan komandalarmen kelissóz júrgizgeni týraly aqparat taraǵan, alaıda belgisiz sebepterge baılanysty eshbirimen ortaq məmilege kele almady. Bıyl qysta «Tobyldyń» usynysyn qabyldap, Qostanaıdan bir-aq shyqty.
Ýkraınalyq sport jýrnalısi Vıktor Hohlıýk Kankavaǵa qatysty mynadaı minezdeme beredi. «Dene bitimi myǵym, jigerli, tehnıkasy myqty fýtbolshy. Jasyl alańdy jaqsy kóre bilýimen kózge túsedi. Qorǵanysqa kóp kóńil bóledi. Alys qashyqtyqtaǵy áriptesterine dopty sheber jetkizýmen erekshelenedi. Soqqylary joıqyn. Əriptesterimen tez til tabysady. Fýtboldan tys bylaıǵy ómirde de kóshbasshy jigit», dep maqtaýyn jetkizgen. Qazaqstan birinshiligi oıyndarynda dəl osyndaı qasıetterin, sheberligin, myqtylyǵyn kórsetip jatsa, artylǵan úmittiń, senimniń aqtalǵany.
«Tobyldyń» bas bapkeri oıynshynyń múmkindigin jaqsy biledi. Kankavanyń komandaǵa kelýine Vladımır Nıkıtenko tikeleı múddeli bolypty. Jartylaı qorǵaýshynyń áleýetin tıimdi paıdalansa, qostanaılyqtardyń alysqa shabary anyq.
Bir jaǵynan ulttyq birinshiligimizge jasy kelgen, Reseıdiń nemese Ýkraınanyń komandalaryna jaramaı qalǵan fýtbolshylar keledi degen áńgime jıi aıtyldy. Degenmen, Kankava sııaqty marqasqalardyń jóni bólek. Halyqaralyq təjirbıesi mol, Eýropa lıgasynyń fınalynda oınaǵan, ulttyq quramasynyń kóshbasshysy. Kəsibıligimen, júrip-turysymen jas fýtbolshylarǵa úlgi bolyp, fýtboldyń kóp syryn úıreteri anyq. «Tobyldaǵy» talaı talanttardy qanatynyń astyna alar, jol kórseter, bar bilgenimen bóliser, qamqorlyq tanytar...
Kópti kórgen tájirıbeli oıynshylar osyndaı ereksheligimen qundy. Olardyń QPL-ǵa fýtboldaǵy ǵumyryn aıaqtaýǵa kelgeni aıtpasa da belgili. Áıtse de Eýropadan qyryq úsh kúndik kemdigi bar qazaq fýtboly úshin mundaı oıynshylar qajet-aq.
Erkebulan JOMART,
«Egemen Qazaqstan»
