Máselen, semeılikter aldaǵy ýaqytta «InfoBus» mobıldi qosymshasy arqyly qaladaǵy qoǵamdyq kólikterdiń júrip-turýyn qadaǵalaı alady. Búginde GPS-monıtorıngi bar ınteraktıvti kartany 43 myń semeılik qoldanyp júr. Qoǵamdyq kóliktiń qyzmetin baǵalaıtyn «BusReport» baǵdarlamasy tasymaldaýshylar tarapynan jol berilgen birneshe máseleni anyqtady. Máselen, byltyr qalalyq sot boıynsha «Semavtopark» JShS-imen kelisimshart buzylǵan bolatyn. Bul avtopark qala aýmaǵynda №5, 8, 10, 22, 24, 37, 43 jáne 45 baǵyttaryna júrgen eken. Búginde bul baǵyttar tender konkýrsy ótkenge deıin «Mýsapırov» JK men «Taksomotorly park» JShS-na ýaqytsha berildi. Oblys basshysy Danıal Ahmetov О́skemen men Semeıdegi qoǵamdyq tasymal qyzmetindegi kemshilikterdi synǵa alǵan bolatyn. О́ńir basshysynyń aıtýynsha, «tasymaldaýshylar on jyldan asyp ketse de, avtobýstaryn jańartpaıdy, biraq jolaqysyn ósirýdi suraýǵa bar». Byltyr jeltoqsan aıynda Semeıde qala tasymaly boıynsha jańadan 20 avtobýs iske qosyldy.
Oblys ákiminiń aıtqan syny oryndy, – dedi Semeı qalasynyń ákimi Ermak Sálimov, – 2015 jyly Kólik jáne kommýnıkasııalar mınıstrligi «eki jyl ótkende tasymaldaýshy óz avtobýstaryn jańartý kerek» degen buıryq shyǵarǵan edi. О́kinishke qaraı, tasymaldaýshylarmen bekitiletin bes jyl burynǵy kelisimshartta bul shart kórsetilmepti. Oblys ákimi qoǵamdyq tasymal qyzmetiniń sapasyn bilý úshin Semeıge kelip, avtobýstarǵa otyryp, qalany aralap kórdi. Mine, jyldyń basynan bastap avtobýs parkin jańartýǵa oraı konkýrstyń talap-sharttaryn ózgerttik. Konkýrsqa daıyn bolý maqsatynda, máselen, «Mýsapırov» JK óziniń 20 avtobýsyn jańartty. Olar №5, 8 jáne 22 baǵytqa júredi. Taǵy da 50 avtobýsty satyp alýdy kózdep otyr.
Bir jaqsysy, endi Semeıde elektrondy bılet máselesi sheshilmek. Avtobýstarda tegin Wi-Fi qyzmeti bolmaq. Semeıdiń avtobýstary osylaı zamanaýı baǵytta halyqqa qyzmet kórsetetin boldy.
Al О́skemende jolaýshy tasymaldaýshylarynyń máselesi ýshyǵyp tur. Avtobýstardy jańartý isine uqyptylyqpen qarap, myqtap qolǵa alýdy tapsyramyn. Semeıde jańa qoǵamdyq kólikter satyp alynyp jatyr. О́skemen qalasynyń ákimi Qýat Tumabaev pen tasymaldaýshylarǵa jol kartasyn ázirleýge 10 kún ýaqyt beremin, – dedi tasymaldaýshylarmen kezdesken Danıal Ahmetov.
Esterińizge sala ketsek, 2017 jyldyń qysynda qalalyq qoǵamdyq kólik jolaqysy 90 teńgege kóterilgen. Ol kezdegi kásipkerler ýáji men ýádesi tasymaldaý jaǵdaıyn jaqsartý edi.
Raýshan Nuǵmanbek,
jýrnalıst
Semeı
