Qujattarǵa «AHQO ákimshiligi» AQ Basqarma Tóraǵasy Nurlan Qusaıynov pen AlmaU rektory Gúlmıra Qurǵanbaeva qol qoıdy.
Zerthananyń qyzmeti qarjy tehnologııalary salasyndaǵy ınnovasııalyq sheshimderdi zerdeleýdi, kadrlardy daıarlaýdy jáne Qazaqstanda pılottyq fınteh jobalardy iske qosýdy kózdeıtin bolady.
«Bizdiń basty mindetimiz fınteh jobalardyń damýyna barynsha qolaıly jaǵdaı jasaý. Qoıylǵan mindetke qol jetkizýdiń negizgi faktory retinde quzyrettilik pen naryqta kásibı kadrlardyń bolýyn aıtar edim. Sondyqtan AHQO men Almaty menedjment ýnıversıteti arasyndaǵy yntymaqtastyq qarjy tehnologııalary ekojúıesiniń barlyq qatysýshylaryna paıdaly bolatynyna senemin», - dedi «AHQO ákimshiligi» AQ sıfrlyq tehnologııalar jónindegi dırektory Á. Jıenbaeva.
AlmaU Prezıdenti Asylbek Qojahmetov AHQO-nyń qoldaýymen AlmaU-da fınteh zerthananyń qurylýy IT-tehnologııalardyń naqty bıznespen yqpaldasýyndaǵy mańyzdy qadam ekendigin atap ótti.
«Ásirese ýnıversıtetimizdegi Double Major qos dıplom jáne Major Minor baǵdarlamalary iske asyrylyp otyrǵanyn jáne sol baǵdarmalardyń sheńberinde stýdentter qarjy mamandyǵyn oqı otyryp, ekinshi qosymsha «Aqparattyq tehnologııalar» mamandyǵyn nemese kerisinshe tandaı alatyndyǵyn eskersek, «AlmaU úshin AHQO-men osy salada yntymaqtastyq jasaýy óte mańyzdy. Osylaısha, biz osy salalardy birden qamtıtyn mamandardy – osy salanyń sıfrlyq damýy jóninde ózindik oı-pikiri bar qarjygerlerdi daıyndap otyrmyz», - dedi AlmaU Prezıdenti.
Qujatqa sáıkes, taraptar qarjy tehnologııalarmen jumys isteý boıynsha stýdentter men mamandardyń quzyrettiligin arttyrý maqsatynda birikken ǵylymı-bilim berý sharalaryn semınarlar, trenıngter jáne konferensııalardy ótkizýge nıettenip otyr.
