Basqarmanyń málimeti boıynsha, 2018 jyldyń 7 aqpanyna Qyzylorda oblysynyń aýmaǵyna 345 m3/sek sý kelip, Qyzylorda sý torabynan tómen qaraı 320 m3/sek sý bosatylýda.
Soltústik aýdandarda Syrdarııa ózeni betinde tolyqtaı muz qatsa, ońtústik aýdandarda muz qatý prosesi kúsheıýde. Muzdyń qalyńdyǵy 20 – 60 sm quraıdy.
«2018 jyldyń 29 qańtarynda Syrdarııa aýdany, Qaljan Ahýn aýylynyń ońtústik – batys aýmaǵynda ornalasqan «Áset» ýchaskesiniń tusyndaǵy qorǵanys bógetiniń rolin atqaryp turǵan «Alasıyr» kanaly bógetiniń buzylýy nátıjesinde aýyl sharýashylyǵy jerlerine sý jaıyldy.
Sý jaıylýǵa muz astynan qalyńdyǵy 2-2,5 metr bolatyn shuǵanyń júrýinen keptelister qalyptasyp, sý deńgeıiniń joǵarylaýy sebep bolýda.
Qazirgi tańda qorǵanys bógetterin nyǵaıtý sharalary júrgizilýde. Bul jumystarǵa 2 merdiger mekemeden 16 birlik tehnıka men 60 adam jumyldyrylýda. Atalǵan jaǵdaıǵa baılanysty Syrdarııa aýdany ákimdigimen tabıǵı sıpattaǵy tótenshe jaǵdaı jarııalanýda», - dep málimdedi basqarma basshysy S.Sermaǵambetov.
Qyzylorda qalasy men oblystyń eldi mekenderinde sý basý qaýpi joq. Jalpy oblys boıynsha jaǵdaı qatań baqylaýda.
