Elbasynyń Ult josparynda kózdelgen týrıstik ındýstrııany damytý bastamasyn júzege asyrý úshin 2017 jyly Týrıstik salany damytýdyń 2023 jylǵa deıingi tujyrymdamasy da qabyldanǵan bolatyn.
Osy sharalar elimizdiń týrızm salasynda jumys atqaryp otyrǵan kásipkerlerimizge zor múmkindik ashýda. Biraq, qabyldanǵan kóptegen qujattardyń ishinde osy ıgi sharalarǵa óz kedergisin jasap otyrǵan máseleler de bar. Mysaly, 2016 jylǵy 30 qarashada Salyq kodeksiniń 342-babyna engizilgen ózgeristerge sáıkes, jerasty sýlaryn óndirýge salynatyn salyqtyń mólsheri 1 tekshe metrge aılyq eseptik kórsetkishpen sanalatyn bolǵan. Iаǵnı, sanatorıı-kýrorttyq statýsy bar saýyqtyrý oryndary 1 tekshe metr sýǵa shamamen 6 teńge tólese, dál sondaı qyzmet atqaryp otyrǵan sanatorıı statýsy joq jaı demalys oryndary sý salyǵyn 350 ese artyq nemese ár tekshe metr sýǵa 2121 teńge tóleýge mindetti bolǵan.
Osy máselege qatysty 2017 jyldyń basynda «Aq jol» partııasyna elimizdiń týrıstik demalys salasynda jumys atqaratyn birqatar mekemeniń, 30-dan astam shaǵyn kásipkerdiń atynan shaǵym hattary kelip tústi. Bul hattarda jergilikti memlekettik kiris organdary osy demalys zonalary sanatorıı-kýrorttyq mekeme bolyp tabylmaıdy degen syltaýmen ár kásipkerdiń moınyna 20 mln teńgeden astam salyqtyq qaryzdy artyp, búgingi kúnge aıyppulmen birge ol 28 mln teńgeden asyp ketkeni aıtylǵan.
Mundaı bas kótertpes somalar men salyq organdarynyń is qımyldary shaǵyn demalys zonalarynyń jabylýyna ákelip soǵatynyn jáne júzdegen jumys oryndary qysqaryp, Elbasy aıryqsha nazar aýdaryp otyrǵan ishki týrızmdi damytý, kásipkerlikti qoldaý, ákimshilik kedergilerdi azaıtý saıasatyna qarama-qaıshy áreketke jol beriletinin eskertkimiz keledi.
Atalǵan másele boıynsha «Aq jol» partııasynyń 2017 jylǵy 24 aqpanynda Memlekettik kirister komıtetine joldaǵan hatyna «Sheshim salalyq mınıstrlikterdiń tujyrymdamalarynan keıin qabyldanady» degen jaýap alǵan bolatynbyz. 2017 jylǵy 25 jeltoqsanda qabyldanǵan jańa Salyq kodeksiniń normalaryna sáıkes, biz qozǵaǵan máseleler oryn taýyp, demalys zonalary óndiretin jerasty sýlaryna ádil stavkalar qoıylǵanyn kórip otyrmyz. Kásipkerlerdiń jaǵdaıyn túsingen memlekettik organdarǵa da rızashylyǵymyzdy bildiremiz. Alaıda, qabyldanǵan jańa stavka joǵaryda atalǵan kásipkerlerge jeńildik ákelip otyrǵan joq. Eseptelgen salyq somalary aıyppuldarymen birge kásipkerlerdiń moıyndarynda tur. Onyń ústine ósimi de kún sanap artýda.
2016 jyldyń sońynda sanatorıı statýsy joq demalys-saýyqtyrý mekemelerine joǵary tarıfterdi engizý sheshimi nebári bir jyldan soń kúshi joıylyp, ol sheshimniń qate ekendigine búgin kózimiz jetip otyr. Sondyqtan Salyq kodeksiniń jańa redaksııasynyń normalarynda 2016 jyldyń 1 qańtarynan bastap qoıylǵan shottardy qaıta esepteý qarastyrylýy qajet dep sanaımyz. Osyndaı sheshim qabyldanǵan jaǵdaıda, ol týrıstik ındýstrııanyń damýyna jańa serpilis beredi degen senimdemiz.
Berik DÚISENBINOV,
Májilis depýtaty
