Mine, osy saýalǵa Mádenıet jáne sport mınıstri Arystanbek Muhamedıulynan jýyrda tómendegideı jaýap keldi:
«Mádenıet jáne sport mınıstrligi sizderdiń ár oblysta mektep-ınternat-kolledj ashý týraly saýaldaryńyzdy qarap, kelesini habarlaıdy. Premer-Mınıstr B.Saǵyntaevtyń 2018 jylǵy 3 qańtardaǵy olımpıada rezerviniń respýblıkalyq mamandandyrylǵan ınternat-kolledjderiniń úlgisi boıynsha oblystyq sportqa daryndy balalarǵa arnalǵan mektep-ınternattardy qaıta qurýdy uıymdastyrý jáne Atyraý, Qostanaı, Mańǵystaý oblystarynda, Astana qalasynda atalǵan bilim berý uıymdaryn ashý týraly tapsyrmasyn oryndaý jáne ortańǵy býyndaǵy jattyqtyrýshylar kadrlaryn tıimdi paıdalaný maqsatynda mınıstrlik 2018 jylǵy 16 qańtardaǵy buıryǵymen olardy qaıta uıymdastyrý jóninde komıssııa qurdy.
Qazir Aqtóbe oblysy ákimdiginiń Eset batyr atyndaǵy sport mektep-ınternatyn «Eset batyr atyndaǵy olımpıada rezerviniń oblystyq mamandandyrylǵan mektep-ınternat-kolledji» dep ózgertý týraly qaýlysy bekitildi. Búgingi kúni onda «jattyqtyrýshy – oqytýshy» mamandyǵyn daıarlaý boıynsha bir top jasaqtalyp, stýdentter bilim alyp jatyr.
Qyzylorda oblysynda ákimdiktiń qaýlysyna sáıkes, Jalańtós Bahadúr atyndaǵy oblystyq sport mektep-ınternatyn olımpıadalyq rezervtiń oblystyq mamandandyrylǵan mektep-ınternat-kolledji retinde qaıta qurý jumystary júrgizilýde. Pavlodar, Aqmola oblystary men Almaty qalasynda da osyndaı jumystar júrgizilip jatyr. Batys Qazaqstan men Soltústik Qazaqstan oblystarynda bul jumystar endi qolǵa alynýda. Al Almaty, Shyǵys Qazaqstan, Jambyl, Qaraǵandy, Ońtústik Qazaqstan oblystary bul isti aldaǵy ýaqytta qarastyratyndyǵyn habarlaıdy» delingen jaýapta.
Sóıtip, Á.Moldaǵulova atyndaǵy sport mektep-ınternaty endi sporttyq kolledj bolyp qaıta qurylyp, bitirgen túlekterine orta deńgeıdegi maman kýáligin qosa tapsyratyn bolady. Bul alys aýdandardan kelip, oqyp jatqan az qamtylǵan otbasylar balalarynyń aýyldaryna baryp sporttyq nusqaýshy, jattyqtyrýshy bolýyna yńǵaıly jaǵdaı týǵyzary sózsiz. Sol ıgilikti iske Májilis depýtattary da eleýli úles qosqany kórinip tur.
Daıyndaǵan
Jaqsybaı SAMRAT,
«Egemen Qazaqstan»
