Aldymen Basqarma tóraǵasy arnanyń ótken jyldaǵy tolaǵaı tabystary men jemisti jetistikterin sóz etti. Aıtalyq, qazaqtyń tól ónerin dáripteıtin «Men qazaqpyn» halyqaralyq mýzykalyq jobasy men 8 memlekette tikeleı translıasııa arqyly kórsetilgen «SilkWayStar» megajobasy kórermender arasynda joǵary baǵalanyp, ótken maýsymnyń basty jańalyǵy bolǵandyǵyn aıtty. Sondaı-aq, 2017 jyly «Parasat maıdany», «1stýdııa», «Basty taqyryp», «Másele», «Elden habar» sııaqty qoǵamdyq-saıası jáne aqparattyq-saraptamalyq jobalardyń sany artyp, kórermenge jol tartqan.
«О́tken jyly kontentti jańartý barysynda áleýmettik jobalardyń sany artty, aqparattyq-saraptamalyq baǵdarlamalardyń formaty ózgerdi. Eń bastysy, ózimizdiń ishki teleónimniń úlesi 80 paıyzǵa ósti, ıaǵnı bul syrttan satyp alynbaǵan kontent. Biz ári qaraı da kontentti jańartý jumystaryn jalǵastyryp, sapaly týyndylardyń sanyn arttyrýǵa atsalysamyz», dedi Erlan Qarın.
Máslıhatta málim bolǵandaı, ulttyq telearnada jańa televızııalyq maýsym dástúr boıynsha, naýryz aıynyń basynan bastalmaq. «Qazaqstan» telearnasynan birneshe jańa jobalar men telehıkaıalar kórermenge jol tartpaq. Aldaǵy ýaqytta elimizdiń tarıhynan syr shertetin «Alash aqıqaty» baǵdarlamasy men «Bala kóńili» atty balalar tárbıesin qozǵaıtyn gýmanıtarlyq-aǵartýshylyq joba shyǵatyn bolady. Olardyń qatarynda kóktemgi maýsymnyń basty tusaýkeseri «Júrsinniń júırikteri» atty aqyndar saıysy da bar.
Joǵaryda aıtylǵandaı, ulttyq arna ózderiniń turaqty kórermenderin jańa maýsym aıasynda birqatar jańa otandyq telehıkaıalarmen qýantpaq. Atap aıta ketsek, aǵymdaǵy jyldyń 26 naýryzda Alash zııalylarynyń HH ǵasyrdyń basynda Táýelsizdik jolyndaǵy taǵdyryn baıandaıtyn «Tar zaman» telehıkaıasy efırge shyqpaq. Sonymen birge kórermender «Týǵan jer», «Súıe bilseń-2», «Jaralanǵan júrekter», «Ińkár júrek-3» syndy telehıkaıalardy tamashalaıtyn bolady.
«Ulttyq arnada ár jyldary kóptegen tanymal tulǵalar, zııaly qaýym ókilderi eńbek etip, Qazaq televızııasynyń damýyna úlken úlesin qosty. Olardyń atqarǵan orasan eńbekterin umytpaý – bizdiń paryzymyz. Aqpannyń basynan bastap, ár jeksenbi saıyn ulttyq arnanyń «Altyn qorynda» saqtalǵan, kezinde kórermenniń kóńilinen shyqqan burynǵy baǵdarlamalardy efırge shyǵarýdy uıǵardyq. Sondaı-aq, ulttyq arnanyń «Tańsholpan», «Dara jol», «Kelbet» jáne basqa da baǵdarlamalarynda otandyq televızııa ardagerleriniń qatysýymen arnaıy shyǵarylymdar jaryq kóredi. Munymen qosa, kórermenderge tosyn syı retinde, burynǵy telejýrnalıster men dıktorlar júrgizýshi bop efırge shyǵatyn bolady», dedi Basqarma tóraǵasy Erlan Qarın.
Mıras ASAN,
«Egemen Qazaqstan»
