Oblys ortalyǵy – Atyraý qalasyndaǵy Nazarbaev zııatkerlik mektebiniń bir top oqýshysy kompanııanyń ınteraktıvti murajaıynda bolyp, qazaq munaıynyń tarıhymen keńinen tanysty. Murajaıda mektep oqýshylaryn «Embimunaıgaz» AQ Áleýmettik saıasat jónindegi basqarýshy dırektory Sálimjan Naqpaev qarsy alyp, ekskýrsııanyń maqsatyna toqtalyp ótti.
– El ekonomıkasyndaǵy jetekshi sala – munaı-gaz sektorynyń qalyptasýy, qaryshtap damýy osy ınteraktıvti murajaıda keńinen kórinis tapqan. Qazaq munaıynyń bastaýynda turǵan Embi óńiriniń atalmysh sala tarıhynda alar orny erekshe. Bul óńirde alǵashqy qazaq jumysshy taby qalyptasty. Keshegi Ekinshi dúnıejúzilik soǵys kezindegi embilik munaıshylardyń Jeńiske qosqan úlesi ushan-teńiz. Soǵystan keıin toqyraǵan sharýashylyqty qalpyna keltirý jumystarynda da munaıshylardyń úlesteri mol. Búgingi urpaq aǵa býynnyń osynaý erlikteri men eńbekterin bilip ósýi kerek. Osy maqsatta basqarma tóraǵasy Ánýar Erkinuly Jaqsybekov ınteraktıvti murajaıdy tek kompanııa qyzmetkerlerine ǵana emes, oblystyń jańalyqqa jaqyn barlyq jastaryna kórsetý jóninde usynys bildirip, bastama kótergen bolatyn, – dep atap ótti S.Naqpaev.
Bolashaqta munaı-gaz salasy mamandyǵynyń ıesi atanýǵa nıeti bar jáne bul baǵytta túrli ǵylymı jobalarǵa qatysyp júrgen talapkerler ózderin tolǵandyrǵan saýaldarǵa kompanııa qyzmetkerlerinen jaýap alyp, bilimderin tolyqtyrdy.
– Qazaq munaı-gaz óndirisiniń ǵasyrdan astam tarıhy sonaý ejelgi dáýirlermen sabaqtasyp jatyr. Búgin biz Embiniń ken alańy Qarashúńgilden alǵash munaıdyń tabylýy, Qazaqstan munaı ónerkásibiniń qalyptasýy men «Embimunaı» tresiniń qurylýy týraly derekterdi osy murajaıdan taptyq. Meniń otbasymdaǵy adamdardyń barlyǵy derlik munaı-gaz salasynda eńbek etedi. Murajaıǵa kelip, meniń de osy salany damytýǵa degen qyzyǵýshylyǵym arta tústi, – deıdi mektep oqýshysy Ásem Tóreǵalıeva.
Danııar Djaksenov atalǵan oqý ornynyń 10-shy synybynda bilim alýda.
– Murajaıdyń «Intro», «Alǵashqy ashýlar», «Tehnologııa ýaqyty», «Uly Otan soǵysy», «Medıaortalyq» jáne basqa da bólimderi qundy málimetterge toly. Murajaı zamanaýı úlgide jasaqtalyp, únemi jańartylyp otyratyny mańyzdy, – dedi ol.
Atap ótý kerek, qazirgi tańda murajaıdy tamashalaýǵa nıet bildirýshiler qatary artyp otyr. Interaktıvti murajaı budan bólek J.Dosmuhambetov lıseıi, Apec Petrotechnic joǵary kolledji, Atyraý munaı-gaz ýnıversıteti, H.Dosmuhamedov atyndaǵy Atyraý memlekettik ýnıversıteti, Atyraý tehnologııalyq kolledji, Kaspıı óńiriniń qazirgi zamanǵy kolledji, Bıznes jáne quqyq kolledji, Atyraý medısınalyq kolledji, Atyraý agro-tehnıkalyq kolledjiniń oqýshylary men stýdentterin qabyldaıdy.
Qosuıym MUQAShEV
