Foto: Temirbolat Toqmambetov
Mundaı shara Batys Qazaqstan oblysynda tuńǵysh ret uıymdastyrylyp otyr. Sharaǵa Qazaqstannyń ár óńirinen – Atyraý, Mańǵystaý, Aqmola, Almaty, Jambyl, Qaraǵandy, Qyzylorda oblystarynan, Astana men Almaty qalasynan jıyrmashaqty qusbegi qatysýda. Bir qyzyǵy, irgede ótip jatqan dýmannan qalǵysy kelmeı, Reseıdiń kórshiles Samara, Tolıattı, Ýlıanov qalalarynan qarshyǵa men ıtelgi baptap júrgen qusbegiler de jolǵa shyqqan eken. Qyzyl kitapqa engen qustaryn shekaradan ótkizbeı, tek ózderi kelýge májbúr bolǵan sheteldik qonaqtar Oraldaǵy qusbegiler saıysynyń uıymdastyrylýyna, el-jurttyń yqylasyna erekshe qyzyǵýshylyqpen qarap júrdi.
– Osyndaı týrnır byltyr Mańǵystaý men Atyraý oblysynda ótti. Bıylǵy shara Batys Qazaqstan oblysy basshylyǵynyń qoldaýymen ótip otyr. Muny qusbegilik dástúrdiń elimizdiń batys óńirinde qaıta jandanýy dep aıtýǵa bolady. Oraldaǵy Ulttyq sport mektebi janynan qusbegilik bólimi ashylady dep senemiz, – dedi Ulttyq sport túrleri qaýymdastyǵynyń I vıse-prezıdenti Erlen Ospanov.
Jalpy, bul sharany negizgi uıymdastyrýshy – Batys Qazaqstan oblystyq sport basqarmasy bolǵanymen, óńirdegi týrızm jáne syrtqy baılanystar basqarmasy, «Atameken» ulttyq kásipkerler palatasynyń óńirlik fılıaly, qoǵamdyq uıymdar men jekelegen belsendi azamattar qusbegiler saıysynyń jalpyhalyqtyq merekege aınalýyna kóp úles qosty. Jan-jaqty jarnama men nasıhattyń nátıjesinde bul sharany kórý úshin Reseı Federasııasynyń Astrahan, Saratov, Samara, Orynbor óńirlerinen, Qazaqstannyń ózge oblystarynan arnaıy týrıster kelgen.
Saıystyń alǵashqy kúni qusbegiler irikteý kezeńinen ótti. Erteńine aqtyq báseke-fınalda qyrandar shyrǵa salý, ańǵa túsý sekildi synnan ótti. Aıta keteıik, «Qansonar-2018» respýblıkalyq qusbegiler týrnıriniń 200 myń teńgelik bas júldesin oraldyq kásipker-mesenat, «Saıat» etno-týrıstik ortalyǵynyń quryltaıshysy Murat Jákibaev tikken.
Týrnır qorytyndysynda III oryn Kókshetaýdan kelgen Bergenbaı Tastambek pen astanalyq Serikbek Kúntýǵanǵa buıyrsa, II oryndy jambyldyq Baqdáýlet Babajan jeńip aldy. Al «Naryn» atty qyranymen barlyq básekede ózge áriptesterinen basym túsken atyraýlyq Arman Qoshqarovqa týrnırdiń bas júldesi buıyrdy.
Qazbek QUTTYMURATULY,
«Egemen Qazaqstan»
Batys Qazaqstan oblysy
