QR Prezıdentiniń «Altyn sapa» syılyǵyn ıelenýge arnalǵan baıqaýǵa jáne «Qazaqstan úzdik taýary» respýblıkalyq kórme-baıqaýyna ótinim qabyldaý bastaldy.
Bıyl «Altyn sapa» baıqaýynyń uıymdastyrylýynda birqatar ózgeris bar. Jeńimpazdarǵa alǵash ret 450 AEK, ıaǵnı 1 mln 82 myń teńge kóleminde aqshalaı syılyq tabystalatyn boldy. Kásipkerler utyp alǵan qarajatty qalaýlaryna qaraı halyqaralyq sapa baıqaýlarynyń, onyń ishinde Táýelsiz Memleketter Dostastyǵynyń óndirýshileri arasynda ónim men qyzmet kórsetý sapasynyń úzdigi ataný baıqaýyna qatysý shyǵynyn óteı alady.
«Altyn sapa» baıqaýynda aýyl sharýashylyǵy ónimin óndirýshilerge arnalǵan atalym men «Úzdik ındýstrııalyq joba», «Úzdik ınnovasııalyq joba» arnaıy syılyqtary bekitildi. Osylaısha, bıyl otandyq 14 kompanııa «Altyn sapa» jeńimpazdary atana alady. Almaty qalasynyń óndirýshileri ádette «Altyn sapa» baıqaýynda birneshe júldeli oryndy ıelenedi. Bizdiń qalada bıznes aıtarlyqtaı damyǵan, tıisinshe otandyq naryqta kóshbasshy bolyp, tipti úzdik eksporttaýshy atanǵan tanymal kompanııalar da kóp», - deıdi Almaty qalasy kásipkerler palatasynyń sarapshysy Lıýbov Alekseeva.
«Altyn sapa» baıqaýyna zańdy tulǵalar da, jeke kásipkerler de qatysa alady. Baıqaý uıymdastyrýshylary atalym men sanatty tańdaýda shataspaýǵa keńes berip otyr.
«Ár atalymda sanat boıynsha úsh syılyq bar: shaǵyn, orta jáne iri bıznes. «О́ndiristik maqsattaǵy úzdik kásiporyn» atalymynda shaǵyn bıznes sýbektisi múldem joq. Orta men shaǵyn arasyn tańdaı otyryp, ózińdi shaǵyn bızneske jatqyzǵan jón. Al halyqqa arnalǵan taýarlar sektorynda shaǵyn bıznes ókilderi óte kóp. Munda sapa menedjmentiniń júıesi bolǵanyna asa mán beriledi», – dedi «Atameken» QR UKP Shaǵyn jáne orta bıznesti damytý departamenti dırektorynyń orynbasary Saltanat Ábdikárimova.
Saltanat Ábdikárimovanyń aıtýynsha, baıqaýda jeke patentti ıelený, túrli noý-haý daıyndaý, halyqaralyq kórme men baıqaýǵa qatysý ári jeńimpaz atanýǵa artyqshylyq beriledi. Qujat daıyndaǵanda 38 paraqtan aspaý kerek degen lımıtti saqtap, óndiristik bazanyń sýretterin de qosý kerek. Taza tabysty kórsetý mindetti emes. Tabys mynadaı jyly 100%, odan keıin 120% boldy degen kórsetýge bolady. Qazylar alqasy damý trendine nazar aýdarady. Komıssııa devalvasııany da eskeredi. Keıbir kórsetkishterdiń tómendeýi sheshimge áser etpeıdi. Eń bastysy aǵymdaǵy jyly salyq qaryzy bolmaý kerek. Komıssııa baıqaýdyń árbir qatysýshysyna ónim men qyzmet kórsetý sapasyn jaqsartýǵa qatysty jekelegen usynym daıyndaıdy.
Aınash ESALI,
«Egemen Qazaqstan
