Elbasynyń partııa qyzmetin jańǵyrtý jónindegi tapsyrmasyna oraı áleýmettik baǵyttaǵy jumys barysyn odan ári kúsheıtý kózdelip otyr. Soǵan baılanysty múmkindigi shekteýli jandarǵa, ardagerlerge jáne halyqtyń az qamtylǵan tobyna qoldaý kórsetýge baǵyttalǵan barlyq partııalyq jobalar qaıta qaralyp, olardyń ózektiligi arta túspek. Basty maqsat – bul jobalardy partııalyq qoldaý kórsetýdiń meılinshe tıimdi quralyna aınaldyryp, sol arqyly halyqqa naqty ári aıtarlyqtaı paıda ákelý.
Sapar aıasynda Máýlen Áshimbaev erekshe qajettiligi bar balalarǵa arnalǵan kúndizgi ortalyq bólimderiniń birine arnaıy at basyn burdy. Atalǵan bólim «Kedergisiz keleshek» partııalyq jobasyn júzege asyrý maqsatynda «Nur Otannyń» tikeleı bastamasymen jáne qoldaýymen ashylǵan bolatyn. Búginde munda 30 bala jartylaı stasıonar jaǵdaıynda arnaıy áleýmettik qyzmetterdi tegin alyp keledi. Jalpy, qala boıynsha 200 balaǵa qyzmet kórsetip otyrǵan osyndaı 3 bólim jumys isteıdi. Taıaýda Jetisý jáne Naýryzbaı aýdandarynan taǵy 2 bólim ashý josparlanyp otyr.
Sonymen qatar «Nur Otan» partııasy Tóraǵasynyń birinshi orynbasary balalardy ońaltý jáne beıimdeý jumystary júrgiziletin arnaıy kabınetterge bas suqty. Atalǵan medısınalyq mekeme qyzmetkerlerimen kezdesken Máýlen Áshimbaev osy saladaǵy ózekti máselelerdi sheshý joldaryn talqylady. О́z sózinde ol aldaǵy ýaqytta partııa erekshe qajettiligi bar jas qazaqstandyqtardy qoldaýǵa aıryqsha kóńil bóletinin jetkizdi. Júzdesý sońynda balalarǵa «Nur Otan» partııasynyń atynan arnaıy syılyqtar tabystaldy. Al ortalyqqa qazirgi zamanǵy «Delfa» logopedti jattyǵý quraly tartý etildi. Bul jattyǵý quralynyń kómegimen keıbir balalarda kezdesetin túrli sýrdologopedti máselelerdi ońtaıly sheshýge múmkindik bar.
Sapar barysynda partııa Tóraǵasynyń birinshi orynbasary Almatydaǵy eń iri saýda-oıyn-saýyq ortalyqtarynyń birinde bolyp, qalanyń shaǵyn bıznes ókilderimen kezdesti. Kásipkerlermen erkin pikir almasyp, osy salany odan ári damytýdyń qyr-syryn talqylaǵan Máýlen Áshimbaev jaqyn arada partııa tarapynan shaǵyn jáne orta bıznes salasyna aıtarlyqtaı qoldaý kórsetiletinin jetkizdi. Naqty aıtqanda, Elbasy, partııa Tóraǵasy Nursultan Nazarbaevtyń tapsyrmasyna oraı «Nur Otan» shaǵyn jáne orta bıznesti damytýǵa jáne qoldaýǵa baǵyttalǵan jańa jobany qolǵa almaq.
«Nur Otan» partııasy Tóraǵasynyń birinshi orynbasary ońtústik astanamyzdyń jastarymen de arnaıy kezdesip, ártúrli taqyrypta áńgime órbitti. Kezdesý SmArt.Point kovorkıng-ortalyǵynda ótti. Atalǵan ortalyq túrli startaptardy júzege asyratyn oryn retinde de belgili. Bul jer aptanyń jeti kúninde táýligine 24 saǵat jumys isteıdi. Munda sóılesý bólmeleri, oıynǵa arnalǵan oryndar jáne sport, konferens-zaldary bar.
Kezdesýde Máýlen Áshimbaev Elbasy, partııa Tóraǵasy Nursultan Nazarbaev el jastarynyń jan-jaqty damýyna barlyq jaǵdaıdy jasap otyrǵanyna nazar aýdaryp, jas ónertapqyshtar men ınnovatorlardy Elbasynyń tapsyrmasyna sáıkes «Nur Otannyń» uıymdastyrýymen ótetin jastar arasyndaǵy dástúrli respýblıkalyq ınnovasııalyq jobalar baıqaýyna qatysýǵa shaqyrdy. Osy rette «Nur Otannyń» jyl saıyn jas ónertapqyshtarǵa óz jobalaryn júzege asyrý úshin arnaıy júlde taǵaıyndaıtynyn aıta ketken jón.
Jastarmen kezdesý barysynda partııa Tóraǵasynyń birinshi orynbasary alda bolatyn «Jas Otan» Jastar qanatynyń sezine de toqtaldy. Onyń sózine qaraǵanda, bul sezd elimizdegi jastar saıasatyna jańasha qarqyn beretin iri is-shara bolady dep kútilýde.
Sapar sońynda Máýlen Áshimbaev Almaty qalasynyń ákimi, partııa qalalyq fılıalynyń tóraǵasy Baýyrjan Baıbek bastaǵan shahardyń partııalyq aktıvimen kezdesti. Partııa Tóraǵasynyń birinshi orynbasary fılıalda jańadan ashylǵan Office of political analysis keńsesiniń jumysymen tanysty. Bul jerde saraptamalyq resýrstardy, ártúrli boljamdardy jáne úlgileýlerdi jedel basqarýǵa, olarmen jumys isteýge barlyq jaǵdaı jasalǵan.
Sondaı-aq Máýlen Áshimbaev «Nur Otan» partııasynyń alǵashqy mýltımedıalyq mýzeıinde boldy. Mýzeı bar bolǵany 10 sharshy metr aýmaqty qamtıdy. Onyń basty ereksheligi de osy. Munda aldyńǵy qatarly sıfrly tehnologııa keńinen qoldanylǵan. Sonyń arqasynda kelýshiler arnaıy LED-ekrannan Elbasy, partııa Tóraǵasynyń ómirbaıanyn tamashalaı alady.
Qalalyq partııa aktıvimen kezdesýde Máýlen Áshimbaev Elbasynyń partııa qyzmetin jańǵyrtý jáne «Nur Otandy» aýqymdy «qaıta júkteý» týraly tapsyrmasy týraly keńinen aıtyp, ony júzege asyrýdyń basym baǵyttaryn usyndy.
Saparbaı PARMANQUL,
«Egemen Qazaqstan»
ALMATY
