Rýhanı mádenıetimizdiń tóltýma muralary sanalatyn ortaǵasyrlyq dinı qoljazbalardyń ulttyń dinı tanymy men qundylyqtaryn jan-jaqty tanytatyn eńbekterdiń orny aıyryqsha. Tamyryn tereńnen alatyn tarıhı jádigerlerdiń ótken men búginniń arasyndaǵy altyn arqaý retinde qazirgi dinı sananyń qalyptasýyna yqpaly zor.
Elbasy N.Nazarbaevtyń «Bolashaqqa baǵdar: rýhanı jańǵyrý» atty maqalasynyń negizgi túıini de ulttyq dúnıetanymdy jańǵyrtý arqyly sanaǵa qozǵaý salýdy kózdeıdi. Bul oraıda áleýmettik-mádenı fenomen retinde ortaǵasyrlyq dinı qoljazbalar ulttyq biregeılikti saqtaý men rýhanı jańǵyrý úderisinde mańyzdy oryn alady.
Dóńgelek ústelde ortaǵasyrlyq qundy qoljazbalardy zerttep, ǵylymı aınalymǵa engizý men jaryqqa shyǵarý, qazaq tiline aýdarý máseleleri sóz boldy. Iran Islam Respýblıkasynyń Qazaqstandaǵy elshiliginiń keńesshisi Masýd sheıh Zeıneddın ortaǵasyrlyq qundy eńbekterdiń mańyzyna toqtalyp: «Ortaǵasyrlyq dinı kitaptardyń musylmandardyń sanasyna yqpal etetini anyq. Sondyqtan osyndaı derekkózderden áserlenbes buryn, kóptegen oıshyldardyń sanalarynda ózderiniń tarıhy, mádenıeti men órkenıetine qatysty tanym qalyptasady. Olar dinı derekkózderdi zerttegen kezde ózderiniń oı-pikirlerimen sáıkestendire otyryp qabyldaıdy. Osylaısha ár mazhab pen ulttyń oıshyldary úshin pikir almasýdyń qajettiligi týyndaıdy», dep sózin qorytyndylady.
Qoljazbalar jáne sırek kitaptar ulttyq ortalyǵy dırektorynyń orynbasary Ámirequl Ábýov: «Biz ózimizden shyqqan orta ǵasyrdaǵy danalarymyzdy durys nasıhattap, dáripteı almaı kelemiz. Qazir álemniń ár túpkirindegi qoljazbalardy jınap jatyrmyz. Sonyń ishinde ál-Farabıdiń qoljazbasy da bar. Negizi ál-Farabıdiń bizdiń jurttan shyqqanyn maqtap tutýymyz kerek. Ol týraly fılm túsirilse jaqsy bolar edi. Sebebi ol bizdiń ulttyq qundylyǵymyzǵa aınalǵan tulǵa», dedi.
Qoljazbalar jáne sırek kitaptar ulttyq ortalyǵy álemde sırek kezdesetin qoljazbalar men ulttyq baılyqtarymyzdy bir arnaǵa jınaǵan qazynaly ordaǵa aınalmaq.
Baǵashar TURSYNBAIULY,
«Egemen Qazaqstan»
