Osyǵan baılanysty Syrtqy ister mınıstrligi Qazaqstan azamattarynyń Birikken Arab Ámirlikteriniń aýmaǵyna kirý kezindegi talaptar týraly habarlaıdy.
1. 2018 jylǵy 10 naýryzdan bastap Qazaqstan azamattary vızasyz negizde halyqaralyq qatynas úshin ashyq ótkizý pýnktteri arqyly Birikken Arab Ámirlikteri aýmaǵyna vızasyz kirýge jáne odan shyǵýǵa, ony kesip ótýge jáne onda 30 (otyz) kúnnen aspaıtyn merzimde bolýǵa quqyly.
2. Álemdegi barlyq áýejaılardaǵy tájirıbedegideı, Birikken Arab Ámirlikterine kirý kezinde Qazaqstan azamattary óz tólqujattaryn kórsetýleri tıis, odan soń olardyń derekteri elektrondyq júıege engizilip, pasport paraǵyna mór basylady;
3. 2017 jylǵy 23 mamyrda Astanada qol qoıylǵan Qazaqstan Respýblıkasy men Birikken Arab Ámirlikteri arasyndaǵy vızasyz saparlar týraly kelisimge ózgerister men tolyqtyrýlar engizý týraly Hattamaǵa sáıkes, pasport jaramdylyǵynyń aıaqtalý merzimi 6 aıdan kem bolmaýy tıis, sondaı-aq halyqaralyq azamattyq avıasııa uıymy (ICAO) talaptaryna saı bolýy kerek;
4. Árbir Qazaqstan azamatynyń, sonyń ishinde kámeletke tolmaǵandardyń da jeke óz pasporttary bolýy tıis. Sábıler ata-analarynyń biriniń pasportyna jazylmaýy tıisti;
5. Qazaqstan Respýblıkasynyń azamattary óz pasporttarynyń qoldanys merzimderin anyq bilýge, sondaı-aq Birikken Arab Ámirlikteri zańdarry men onda bolý erejelerin saqtaýy tıis;
6. Birikken Arab Ámirlikterine halyqaralyq izdeýde júrgenderden basqa barlyq Qazaqstan azamattaryna vızasyz kirýge ruqsat etiledi jáne olardyń BAÁ-ge deıin qandaı elderde bolǵany esepke alynbaıdy;
7. Kámeletke tolǵan, zań júzinde óz basyna jaýap bere alatyn Qazaqstan Respýblıkasynyń áıel azamattaryna Birikken Arab Ámirlikteriniń aýmaǵyna er adamnyń ertip júrýinsiz kirýine ruqsat etiledi;
8. Birikken Arab Ámirlikteri aýmaǵynda qaýipsizdiktiń barlyq talaptaryn saqtaýǵa baılanysty kámeletke tolmaǵan balalardy ata-analarynyń ertip júrýi tıis. Al eger, kámeletke tolmaǵan bala ata-anasyz sapar shegetin bolsa, onda balanyń ata-anasy nemese senimdi ókili shyǵýǵa arnap kelisim bergen ári erejege sáıkes (Astanadaǵy BAÁ Elshiliginde, nemese shet elderdegi Birikken Arab Ámirlikteriniń kez-kelgen dıplomatııalyq ókildikterinde) zańdastyrylǵan senimhat usynylýy tıis;
9. Birikken Arab Ámirlikteri zańdary men normatıvtik-quqyqtyq aktilerine sáıkes, vızasyz tártippen barǵandarǵa kelissózder men kezdesýler ótkizýge bolady;
10. Vızasyz tártip boıynsha barǵan Qazaqstan Respýblıkasynyń azamattaryna Birikken Arab Ámirlikteriniń aýmaǵynda jumysqa turýǵa bolmaıdy;
11. Birikken Arab Ámirlikteriniń zańnamalaryna sáıkes, vızasyz bolý tártibiniń merzimin buzǵan azamattarǵa qatysty qarjylaı aıyppul salý túrindegi ákimshilik jaza kózdelgen;
12. Birikken Arab Ámirlikteriniń aýmaǵyna sapar shegýdi nıet etkender qosymsha aqparatty BAÁ Ishki ister mınıstrliginiń resmı saıtynan, nemese «Emirates» pen «Etihad» áýekompanııalary sııaqty resmı tasymaldaýshylardan alýlaryna bolady.
