Olar sondaı mazasyz ári kúlkili haıýan emes pe. Ystyq ólkedegi jasyl ormanyn, qoldy-aıaqqa turmaı butaqtan-butaqqa sekirip, emin-erkin saıran salatyn ortasyn ańsap qyshqyryp, shyńǵyryp jatyr.
Munda ózderin tamashalaý úshin kirgen jurtqa qulaqtary qalqaıyp, kózderi jáýdirep, muńaıyp qaraıdy. Ishteı: «E-eh, sender bizdi túsinbeısińder ǵoı!..» dep kúrsinetin sekildi.
Siz álgi ǵımarattan tezirek shyǵyp ketýge asyǵasyz. Sebebi onyń ishindegi sasyq ıis qolqańyzdy qaýyp, basyńyzdy aınaldyrady.
Shyǵa beriste maımyldarǵa tamaq alyp bara jatqan qyzmetshi kelinshekpen betpe-bet ushyrasyp qaldym.
– Tú-ý, qandaı sasyq!.. – dep murnymdy basqanymdy kórgen ol myrs etip kúlip jiberdi.
Sonsoń:
– Qalaı shydap júrsizder? – dedim sasqanymnan.
– Úırenip ketkenbiz, – dedi ol sergek ún qatyp.
– A-a, ıá-á... solaı eken ǵoı...
Kenet ol qolyndaǵy eki shelegin jerge qoıyp, meniń kózime tiktep qarady da:
– Bilesiz be, árbir mekemeniń ózine tán ıisi bolady, – dedi. – Biraq ony sizder sezbeısizder.
– Múmkin, – dedim men ıyǵymdy qozǵap, ekiushtylaý jaýap qatyp.
– Ras aıtam, – ol óz sózine óziniń senimdi ekenin bildirgisi kelgendeı basyn shulǵyp-shulǵyp qoıdy. – Keı mekemelerden urlyqtyń, jemqorlyqtyń, ashkózdiktiń, ekijúzdiliktiń, jaǵympazdyqtyń, tipti zulymdyqtyń ıisi shyǵyp turady. Olarǵa qaraǵanda myna maımyldar mop-momaqan, qarny toısa boldy, tynyshtala qalatyn beıkúná haıýandar emes pe!..
Sonsoń ol «osymen sóz bitti» degendeı eki shelegin qolyna alyp, ishtegi ý-shý bolyp jatqan maımyldarǵa qaraı asyǵa basyp kete bardy.
Nurǵalı ORAZ,
«Egemen Qazaqstan»
