Sol maqsatta qolǵa alynǵan atalmysh jyr keshi ótken senbide S.Seıfýllın atyndaǵy oblystyq qazaq drama teatrynda óz shymyldyǵyn túrdi. Keshke Qazaqstannyń eńbek sińirgen qaıratkeri, aqyn Serik Aqsuńqaruly bastaǵan bir top ádebıetshi qaýym ókilderi qatysty. Keshke sondaı-aq, Elordamyz Astana qalasynan da jas qalamgerler qara kórsetken. Atap aıtqanda, Erbol Alshynbaı, Almas Núsip, Baǵashar Tursynbaıuly, Yqylas Shalǵynbaı, Álimjan Álisher, Qaırat Seıtqazy syndy jas aqyn-jazýshy, synshy, dramatýrgter kórikti keshtiń kókjıegin keńeıtip ketken.
Aldymen, kesh júrgizýshisi kórermen qaýymǵa Qazaqstan Jazýshylar odaǵynyń Qaraǵandy oblysyndaǵy fılıalynyń jańa dırektory Serik Saǵyntaıdy tanystyrdy.
Poetıkalyq dýeldiń betashar sózin Serik Aqsuńqaruly aıtyp, jas qalamgerlerge sáttilik tiledi. «Mundaı poetıkalyq dýelder tarıhta bolǵan. Oǵan ataqty Esenın men Maıakovskııdi aıtsaq ta jetkilikti. Sol dástúrdi jańǵyrtyp, jańartyp turý kerek. Bul aqyndardyń óleńin teńestirý nemese talastyrý emes, shyn mánindegi óner jarysy dep túsinýimiz kerek», dedi S.Aqsuńqaruly.
Erekshe formatta ótken jyr dodasynda aqyndar 4 kezeń boıynsha baqtaryn synady. Saıysqa qatysýshy 17-25 jas aralyǵyndaǵy 14 úmitkerdiń ishinen qaraǵandylyq jas aqyn Aıdyn Baıys «Jyr qaǵany» dep tanyldy. Ereje boıynsha jerebe tartylyp, taq san tańdaǵan aqyndar qarsylas tańdaýǵa múmkindik aldy.
Ádil baǵasyn berip, qazylyq etken aqyndar B.Múbarak, Q.Asqar, J.Jańqashuly, J.Álıman, J.Baıbulanova bir aýyzdan tańdaǵan dýel jeńimpazy A.Baıys kesh quryltaıshysy, belgili bilim mesenaty Bekzat Altynbekovtiń taǵaıyndaǵan aqshalaı syılyǵyna qol jetkizdi.
Keshtiń kórikti ótýine Qaraǵandy oblysynyń ákimdigi men Qazaqstan Jazýshylar odaǵynyń Qaraǵandy oblystyq fılıaly kómek qolyn sozǵan.
shara sońynda qaraǵandylyq jas aqyndar atalmysh estafetany tarazdyq aqyndarǵa joldady. Ony Qaraǵandy gýmanıtarlyq kolledjiniń dırektory, Taraz qalasynyń týmasy Esjan Ámirov qabyldap aldy.
«Egemen-aqparat»
