«Qyzylorda-Jezqazǵan» poıyzynyń taýqymeti kóp

Gazettiń ústimizdegi jyldyń 16 aqpan kúngi nómirinde jarııa­lanǵan «Temir jol taýqymetin tartyp otyr» atty maqalasyna baılanysty qolyma qalam alýǵa týra keldi. О́ıtkeni men de Aral qa­lasynda turamyn. Sońǵy kezderi ózimniń jáne kishkentaı nemeremniń naýqastanýyna baılanys­ty Astana qalasyna úsh ret ári-beri qatynaýyma týra kel­di. Áli de bolsa kúrdeli ota jasatyp jatqan nemereme birneshe ret baryp-qaıtýǵa týra keletin jaıy bar. Sol sapar­larda eki aradaǵy temir jol qatynasyna baılanys­ty sheshimin tappaı otyrǵan kúr­meýli máselelerdi bastan ke­shirip biraz qıynshylyq kór­dim. Sondyqtan temir jol qaty­nasyna aıtylǵan syn-es­kertpeler durys. Al meniń aıtarym, Qyzylorda (búkil batys betkeıdegi deýge bolady) jaǵynan tóte ári qysqa jol bolyp tabylatyn «Qyzylorda – Jezqazǵan» poıyzyna baıla­nysty júrý kestesi durys sheshilýge tıis. Naqtylasam, Sek­seýil stansasynan shyqqan poıyz Jezqazǵan stansasyna barǵan soń 4 saǵat aıaldaıdy. Sosyn ári qaraı «Jezqazǵan – Astana» poıyzyna otyrýǵa týra keledi. Keri qaıtar jolda da osyǵan uq­sas taýqymet. Astanadan kele­tin poıyz Jez­­­qazǵanda endi 14 saǵatqa jýyq aıaldaıdy, sosyn baryp Qy­zyl­or­da poıyzyna oty­rýǵa týra keledi. Poıyz kún­ara jú­­redi. Jezqazǵan vokzalyn­da­ jolaýshylarǵa jasalǵan jaǵ­daı syn kótermeıdi. Vok­­zal sýyq, qonaqúı joq, kish­kentaı balalary bar analar, múgedekter úshin arnaýly bólme qarastyrylmaǵan. Sondaı-aq Aral teńizi, Abaı sııaqty halyq kóp minetin stansalarda poıyz 5 mınýt qana turady. Sol sebepti jurt túsip-minýge de úlgermeı jatady. Ásirese, avtojol qatynasy jaramsyz bolǵandyqtan halqy kóp Abaı eldi mekeniniń adamdary qalaǵa barýy úshin poıyzǵa kóp minedi, ár reıste 50-70 adamǵa deıin otyryp jatady. Abaı vokzalynda perron salynbaǵan, adamdar bıiktigi 1,5-2 metr vagon tambýrlarynan áreń túsip-minip jatady.

Eki poıyz da «Maral Nur» fır­­­masynyń jeke menshiginde. Osy máseleni qaıta qarap, jo­laý­shylardyń jaǵdaıy úshin eki poıyzdy biriktirýge, nemese aıal­daıtyn ýaqytyn qysqartyp úsh-tórt vagondy kelesi poıyzǵa tirkep jiberip otyrýǵa bolmas pa? Bul – qalyń kópshiliktiń tilegi.

Maqaladaǵy «Bul proble­manyń naqty qashan sheshiletini belgisiz» deýi kópshilikti alańda­tady. Sóz joq, Elbasymyzdyń qoldaýymen Sekseýilden Jez­qazǵanǵa deıingi aralyqta temir jol salynýy el ekonomıkasy úshin de, respýblıkanyń eki qıyryndaǵy halyq tasymaly úshin de mańyzy zor. Dese de bardy bazarlap, qoldaǵy múm­kindikti halyqtyń kóńilinen shyǵatyndaı etip uıymdastyra bilgen durys shyǵar.

Úrgenishbaı QÝATOV,

zeınetker

Qyzylorda oblysy,

Aral aýdany,

Toqabaı aýyly