- О́tken jyly Qaraǵandyda kóktemgi sý tasqynynan keıin balyqtardyń qyrylǵany týraly estidik. Sý marjandary meken etetin toǵandarda aýyr metaldardyń bolǵanyn oqyǵannan keıin ǵylymı zertteý jumysymdy osy taqyrypta jasaǵym keldi, - deıdi Nazarbaev Zııatkerlik mektebiniń 7 synyp oqýshysy Dımash Itemgenov. Synyptasy Bekzat ekeýi las sýdy tazalaýdyń tyń tásilderin tabýdy maqsat etken. Tanymdyq ádebıetterden aqparat jınaǵan ýaqytta jas ónertapqyshtar jemisterdiń arasynda ásirese banannyń aýyr metaldarǵa qarsy qasıeti baryn oqyǵan.
- О́zge jemistermen salystyrǵanda banannyń qabyǵynda antıoksıdanttar kóbirek bolady. Adsorbenttik qosylystardyń emdeý jáne tazalaý qasıeti óte zor. О́ıtkeni olar aýyr metaldardy, zalaldy bakterıalardy sińirgish keledi. Biz birneshe banan qabyqtaryn paıdalana otyryp 12 synaq júrgizdik. Onyń segizinde banan qabyqtary mys, qorǵasyn, nıkel jáne myrysh ıondaryn súzip alǵanyna kóz jetti, - deıdi Bekzat Tilegen.
Oqýshylar bul jańalyqtaryn Astana qalasynda ótken «Zerde» balalar shyǵarmashylyǵyna arnalǵan respýblıkalyq ǵylymı-zertteý baıqaýyna usynǵan. Nátıjesinde júldeli birinshi oryndy ıelendi.
Aıtpaqshy, jańa pisken jasyl tústi bananǵa qaraǵanda, ábden qaraıyp, bosaǵan banannyń quramy aǵzaǵa paıdaly eken. «Sondyqtan aptasyna bir-eki ret banan jegen adamnyń kóńil kúıi kóterińki, kúsh-qýaty mol bolady», - deıdi zııatker oqýshylar.
Baqytgúl BABASh,
«Egemen Qazaqstan».
ATYRAÝ
