Ásirese, birinshi bastama – qarapaıym halyqtyń turǵyn úı alý múmkindigin kúrt ósiretin ózgeris qazirdiń ózinde el-jurttyń kóńilinen shyǵyp jatyr. Sózim dáleldi bolýy úshin naqty mysal keltireıin. Máselen, kúni búgin Oral qalasynda 303 myńnan astam turǵyn bar, solardyń 18 myńdaıy turǵyn úı alý kezeginde tur. Solardyń ishinde 2016 jyly – 833, 2017 jyly 612 turǵyn qonys toıyn toılaǵan eken. Al jańa baǵdarlama boıynsha bankiler jyldyq paıyzdyq mólsherdi 7%-dan asyrmasa, alǵashqy salym retinde úı qunynyń 20%-yn ǵana jınaqtap, óz úıine kire alsa jáne nesıeni qaıtarý merzimi 25 jylǵa sozylsa, úısiz júrgen turǵyndarǵa baspanaly bolýǵa zor múmkindik týǵyzatyny aıdan anyq. Endi tek osy bastamany ómirsheń qylý, sony júzege asyrý joldaryn tezirek qoldanysqa engizý qajet.
Jastardyń joǵary bilim alýyna qosymsha 20 myń grant bólý usynysyn da erekshe yntamen qabyl aldyq. Olardyń 11 myńnan astamyn tehnıkalyq mamandardy daıarlaýǵa baǵyttaý, elimizde tórtinshi ónerkásiptik revolıýsııany ómirsheń qylatyn mamandar ázirleýge tolyq múmkindik ashatyny – qýantarlyq jaıt. Al 2020 jylǵa deıin joǵary oqý oryndary men kolledjderge stýdenttik jataqhana salý týraly Elbasy tapsyrmasy qazirgi kúndegi ózekti máseleniń biriniń sheshimin tabýyna úlken serpin berer edi.
Oral qalasynda joǵary oqý oryndarynda jataqhanaǵa suranys joǵary. Tipti kolledjderdiń kópshiliginde jataqhana joq, barynyń syıymdylyǵy tómen. Bıyl oblys aýmaǵyndaǵy 38 kolledjde – 19,5 myń stýdent bilim alyp jatyr. Al olardyń jataqhanamen qamtylý deńgeıi – 47,3%. Oral qalasynda bul kórsetkish – 39,2% ǵana. Sońǵy kezde memleket tarapynan basymdyq berilip otyrǵan jumysshy mamandyqtaryna daıarlaıtyn arnaýly oqý oryndaryna – Oral gaz jáne salalyq tehnologııalar, ındýstrııaldy jáne polıtehnıkalyq kolledjderine jataqhana óte qajet. Osy másele sheshimin tapsa, qansha jas býyn ókilderi alańsyz oqýǵa múmkindik alar edi.
Elbasymyzdyń bes bastamasy da halqymyzdyń ál-aýqatynyń artýyna, ekonomıkamyzdyń alǵa serpindi damýyna tolyq jaǵdaı jasaıtynyna kámil senemiz.
Málik QULShAR,
Batys Qazaqstan oblystyq
máslıhatynyń hatshysy
ORAL
