Etnıkalyq kóshi-qondy retteýge yqpal etý maqsatynda úshinshi ret ótip otyrǵan sharaǵa Eńbek jáne halyqty áleýmettik qorǵaý, Ishki ister, Syrtqy ister, Densaýlyq saqtaý, Ádilet mınıstrligi, Astana jáne Almaty qalalyq, oblystyq kóshi-qon polısııasynyń qurylymdyq bólimsheleriniń jaýapty mamandary qatysty.
Búgingi aksııa kezinde quzyrly organ ókilderi táýelsizdik jyldary elimizge kóship kelip, túrli sebeptermen 2016 jyldyń 1 qańtaryna deıin Qazaqstan Respýblıkasynyń azamattyǵyn ala almaı júrgen oralmandar men etnıkalyq qazaqtarǵa «Halyqtyń kóshi-qony týraly» zańy men ózge de qaýly, normatıvtik qujattar aıasynda túsindirý jumystaryn júrgizdi.
Sondaı-aq jıynǵa memlekettik emes uıym jetekshileri, oralmandarǵa arnalǵan qoǵamdyq birlestikterdiń basshylary qatysyp, qandastarymyz dóp kelgen qujattyq qıyndyqtar jaıly baıandady. О́ńirlerdegi qujatsyz júrgen aǵaıynnyń ókilderi beınebaılanys arqyly óz ótinishterin aıtyp, memlekettik quzyrly organ qyzmetkerlerinen suraqtaryna jaýap aldy.
«Táýelsizdiktiń alǵashqy jyldarynan bastap elimizge kóship kelse de áli kúnge deıin Qazaqstan azamattyǵyn ala almaı júrgen aǵaıyndarymyzdyń sany az emes eken. Biz búgingi aksııa aıasynda osy máseleler boıynsha usynystar ázirleımiz. «Nur Otan» partııasy azamattyǵyn ala almaı júrgen qandastarymyzdyń máselesin kóterip, qatysty mınıstrlikterge resmı hat jazady. Sóıtip biz osy jóninde vedomstvoaralyq komıssııanyń qurylýyna yqpal etkimiz keledi. Al ol komıssııa búgingi jıynda kóterilgen máselelerdi sheshýge atsalysady», deıdi «Nur Otan» partııasy Respýblıkalyq qoǵamdyq qabyldaý bólmesi meńgerýshisiniń orynbasary Arystanǵalı Sansyzbaev.
Jınalys sońynda aksııaǵa qatysqan bes mınıstrlik pen memlekttik emes uıym jetekshileri bul másele tolyq sheshilgenge deıin áreket etý úshin, birlesken komıssııa qurý boıynsha usynys qabyldandy.
Aıta keteıik, «Nur Otan» partııasynyń byltyr 14 shildede bastaǵan «Kósh kólikti bolsyn» respýblıkalyq aksııasy buǵan deıin de qandastarymyzdy «Halyqtyń kóshi-qony týraly» zańynan habardar etý jáne quqyqtaryn qorǵaý maqsatynda eki ret ótkizilgen bolatyn.
