«5 mamyrǵa josparlanǵan ekinshi kezdesýden bas tarttyq. 18 sáýir kúni komıssııa tyńdalymy ótip, resmı sheshim shyǵady. О́kinishke qaraı odan keıin 5 mamyrǵa deıin jekpe-jekti keń kólemde jarnamalaýǵa ýaqyt az», dedi Erık Gomes. Aıqastyń ótpeıtinine negizgi sebep – meksıkalyq boksshynyń dopıng daýyna ilikkeni bolyp tur.
Alvarestiń ózi kinásiz ekenin aıtyp, uıymdastyrýshylar men jankúıerlerden keshirim surady. «Dopıng daýy meni qatty tańǵaldyrdy. Maǵan eshkimniń kúmán keltirmegenin qalaımyn. Men buǵan deıin de, budan keıin de «taza» sportshy bolyp qala beremin. Sondaı-aq NVO telearnasynan, Tecate, Hennessy jáne taǵy basqa demeýshilerimnen jáne de eń bastysy jankúıerlerimnen keshirim suraımyn. Men sportty qurmetteımin. О́z jankúıerlerime sizderdi jerge qaratpaýǵa ýáde beremin dep aıtqym keledi», deıdi Alvares.
Saýl Alvares 17 jáne 20 aqpan kúnderi klenbýteroldy anyqtaıtyn dopıng-test tapsyryp, ol oń nátıjeni kórsetkendigi úshin bokstan ýaqytsha shettetilgen-di. Osydan eki apta buryn Nevada shtatynyń atletıkalyq komıssııanyń atqarýshy dırektory Bob Bennett Alvares daýyna baılanysty komıssııa otyrysy 18 sáýirde ótetinin aıtqan edi. Eger atletıkalyq komıssııa meksıkalyq boksshyny aıypty dep tapsa, bokstan bir jylǵa alastatylýy múmkin. Al Alvares óziniń dopıng qoldanǵanyn moıyndaıtyn bolsa, jaza merzimi alty aıǵa deıin shegerilmek.
Álı BITО́RE,
«Egemen Qazaqstan»
