Foto: Almaty qalasy týrızm basqarmasy
«Kazakh Tourism Development» kompanııasynyń bas atqarýshy dırektory Erjan Erkinbaev «Almaty Superski: Almaty aglomerasııasyn keshendi damytýdaǵy klasterlik tásildiń artyqshylyqtary» taqyrybynda baıandama jasady. Onyń aıtýynsha, Almaty Superski jobasy Almatynyń taý ınfraqurylymyn jańa deńgeıge kóterýge baǵyttalǵan. Joba aıasynda 60 shaqyrym taý shańǵysy trassasyn salý, 16 zamanaýı aspaly jol iske qosý jáne kúnine 10 myńǵa deıin shańǵyshyny qabyldaý múmkindigi qarastyrylǵan.
Spıkerdiń sózinshe, mundaı aýqymdy joba tek týrızm salasyn ǵana emes, kólik, servıs, shaǵyn jáne orta bıznes, bilim berý baǵyttaryn da qatar damytýǵa serpin beredi.
Sonymen qatar, «Almaty Tau Management» kompanııasy basqarmasynyń tóraǵasy Jan-Per Baralo Eýropa elderiniń tájirıbesine toqtaldy. Ol Fransııa men Aýstrııa qysqy týrızm ındýstrııasynda kósh bastap turǵanyn atap ótti.
Máselen, Fransııada jyl saıyn 54,8 mıllıon, Aýstrııada 52,6 mıllıon shańǵy tebý kúni tirkeledi. Fransııada túnemeler sany 100 mıllıonnan assa, Aýstrııada bul kórsetkish 64,7 mıllıonǵa jetken. Halyqaralyq týrıster úlesi Fransııada – 35%, al Aýstrııada – 76%. Aýstrııanyń qysqy týrızm ındýstrııasynyń jyldyq aınalymy – 12 mıllıard eýro.
Sarapshylardyń pikirinshe, tabysty damý úshin júıeli ınvestısııa, sapaly ınfraqurylym jáne qyzmet kórsetý deńgeıin arttyrý mańyzdy. Fransııada qonaqúılerdiń ortasha tolymdylyǵy – 71%, al eń joǵary kezeńde 85% bolǵan. Bul – uzaq merzimdi ınvestısııalyq saıasattyń nátıjesi.
Almaty taý klasteriniń áleýeti joǵary: Halyqaralyq mamandar pikiri bir arnada toǵysty
Jıynda aıtylǵandaı, taý klasteri tolyq iske qosylǵan jaǵdaıda, Almaty burynǵydaı bolmaıdy. Joba ártúrli biliktilik deńgeıindegi mamandarǵa jańa jumys oryndaryn ashady, ınvestorlar úshin tabysty baǵyt qalyptastyrady, jol, qoǵamdyq kólik, densaýlyq saqtaý syndy ınfraqurylymdy jańǵyrtýǵa yqpal etedi. Ári
jańa mamandyqtar men bilim berý baǵdarlamalaryn damytýǵa jol ashpaq.
Osylaısha, halyqaralyq jáne otandyq spıkerler Almatynyń taý týrızmin damytý bastamalaryn qoldap, klasterlik modeldiń óńir ekonomıkasyna mýltıplıkatıvti áser beretinin atap ótti. Almatynyń tabıǵı áleýetin tıimdi paıdalaný arqyly qala Ortalyq Azııadaǵy jetekshi taý-shańǵy týrızmi ortalyǵyna aınalýǵa tolyq múmkindigi bar.
